Қазақстан ИКАО стандарттарына сәйкестігін 95,7% ға жеткізді

Халықаралық азаматтық авиация ұйымы (ИКАО) Қазақстан Республикасында 2025 жылғы 30 тамыз бен 15 қыркүйек аралығында өткізілген авиациялық қауіпсіздіктің кешенді аудитінің (USAP-CMA) қорытындыларын ресми түрде жариялады, деп хабарлайды Egemen.kz.

Аудит нәтижесінде Қазақстанның ИКАО халықаралық стандарттарына сәйкестік деңгейі 95,7% болды. Бұл көрсеткіш әлемдік орташа деңгейден (72,01%) және Еуропа елдерінің орташа көрсеткішінен (87,92%) айтарлықтай жоғары.

Қазақстанның нәтижесі ТМД елдері мен ИКАО-ның Еуро-Азиаттық (EUR/NAT) аймағы бойынша ең үздік көрсеткіштердің бірі саналады. Салыстырмалы түрде:

Әзербайжан – 74,66%;

Өзбекстан – 85,47%;

Қырғызстан – 85,76%;

Грузия – 89,75%;

Беларусь – 91,85%;

Ресей – 94,14%.

Таяу Шығыс өңіріндегі кейбір елдердің көрсеткіштері де жоғары: БАӘ – 98,4%, Қатар – 96,72%, Сауд Арабиясы – 94,41%.

Қазақстанның авиациялық қауіпсіздік бойынша алдыңғы көрсеткіші 83% болған еді.

Жаңа нәтижелер еліміздің авиациялық қауіпсіздік саласындағы негізгі заңнамасы мен бағдарламаларының, кадрлық даярлық пен техникалық бақылаудың, сапаны басқару және сертификаттау жүйелерінің тиімділігін айқындайды. Бұл көрсеткіш әуежайлардағы қауіпсіздіктің жоғары деңгейін, халықаралық тасымалдаушылардың сенімін және АҚШ бағытындағы тікелей рейстерді ашуға мүмкіндік беретін бірінші санатты алу әлеуетін көрсетеді.

ИКАО бағасы 2019 жылдан бері жүзеге асырылып келе жатқан кешенді реформалардың нәтижесі болып отыр. Бұл кезеңде Қазақстанның авиациялық әкімшілігі құрылып, авиация қызметкерлерінің біліктілігі арттырылды, тәуекелге бағдарланған бақылау тетіктері енгізілді.

Аудит қорытындысы – Қазақстанның жолаушылар мен авиация индустриясы үшін қауіпсіз әрі сенімді әуе қатынасын қамтамасыз етуге бағытталған халықаралық стандарттарға адалдығының нақты дәлелі.