Иммунитетті көтеретін супер өнімді білесіз бе?

Aikyn.kz қырыққабаттың пайдасын өсіру үшін майдың не үшін қажет болатынын newatlas.com материалына сүйеніп түсіндіреді.

Кале қырыққабатының (бұйра қырыққабат) құрамында антиоксиданттар мен қоректік заттардың мол екені бұрыннан белгілі. Жаңа зерттеулер осы «суперөнімнің» пайдалы құрамы ағзаға толық сіңуі үшін қарапайым қоспа керек екенін дәлелдеді.

Миссури университетінің Ауыл шаруашылығы, азық-түлік және табиғи ресурстар колледжінің (CAFNR) зерттеушілері кале қырыққабатының қоректік құндылығы оны шикі немесе пісірілген күйде жегенде адам ағзасы үшін нашар сіңетінін көрсеткен. Өйткені қырыққабаттағы пайдалы заттардың ағзаға сіңуіне май қажет екен.

«Кале – лютеин, α-каротин және β-каротин секілді каротиноидтарды қамтитын, қоректік заттарға аса бай көкөніс. Олар денсаулыққа оң әсер етеді. Бірақ бір мәселе бар. Мәселе мынада: бұл заттарды ағзамыздың сіңіруі қиын. Өйткені олар суға емес, майға еритін қосылыстар», – дейді CAFNR-дегі азық-түлік, тамақтану және дене жаттығулары кафедрасының доценті Руоцзе (Ванесса) Чжан.

Кале – каротиноидтар мен С, Е дәрумендеріне аса бай көкөніс. Фото healthnewshub.org сайтынан алынды

Зерттеушілер кале қырыққабатын жай пісіру немесе оған арнайы әзірленген тұздықтар қосу оның құрамындағы каротиноидтар мен С және Е дәрумендерінің биоқолжетімділігін арттыра ала ма деген проблеманы зерттеген. 

Ғалымдар адамның ас қорытуының зертханалық моделін пайдалана отырып, калені түрлі тәсілмен дайындау нұсқаларын сынаған. Шикі күйде, пісірілген күйде, шикі күйде тұздықпен және тұздықта пісірілген түрде. Алынған үлгілер ауыз қуысы, асқазан және аш ішек фазаларын қамтитын in vitro ас қорыту моделінен өткізіледі. Онда асқорыту сөлдері көмегімен адам ағзасындағы ас қорыту үдерістері имитацияланды.

Нәтижесінде, шикі каледен каротиноидтардың өте аз бөлігі ғана ағзаға сіңетіні анықталды. Ал пісірілген қырыққабаттың ағзаға сіңу көрсеткіші одан әрі төмендеген.

Ал зерттеушілер май негізіндегі, наноэмульсия түріндегі тұздықты шикі де, пісірілген калеге де қосқан кезде каротиноидтардың сіңірілуі айтарлықтай жоғарылаған.

Бұл зерттеу сырт көзге пайдалы болып көрінетін тағамның шынайы тиімділігі еш қоспасыз жегенде төмен болатынын көрсеткен. Азық-түліктерді дұрыс үйлестіру арқылы біз жеген тағамымыздың толық сіңуіне және барынша пайдалы болуына көмектеседі екенбіз. Мәселен, С дәруменін қосымша пайдалану арқылы шпинат пен басқа да жапырақты көкөністерден құрамындағы темірдің жақсы сіңуіне ықпал ететіні жайлы көптеген дәлел  бар.

«Біздің топ адамдардың денсаулығын жақсарту үшін инновациялық азық-түлік өнімдері мен технологияларын әзірлей отырып, тағамтану ғылымын дамытуды мақсат етеді. Біз әрекетке бағытталған ғылым әлемдік тамақтану мен әл-ауқатқа елеулі өзгеріс әкеле алады деп сенеміз және осы миссияға өз үлесімізді қосқымыз келеді», – дейді Чжан.

Қазір зерттеушілер кале мен басқа да көкөністерден қоректік заттардың сіңірілуін жақсарта алатын жаңа тұздықтар түрлерін жасауда. Бұл қоспалар тағамның құндылығы мен денсаулыққа пайдасын өсіреді деп болжануда.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.