iPhone ды әлдеқайда ұзақ пайдалануға болады

Aikyn.kz жыл сайын жаңартылып отыратын смартфондарды пайдаланушылар неге бұрынғыдай сатып алмайтынын bgr.com мақаласына сүйеніп талдайды.

Сарапшылардың айтуынша, қазіргі iPhone иелері смартфондарын бұрынғыдан әлдеқайда ұзақ пайдаланады. 2007-2012 жылдары iPhone қолданушылары телефондарын орта есеппен 2-3 жыл сайын ауыстыратын. Бұған бірнеше себеп әсер еткен. Біріншіден, Apple әр жаңа модельде айтарлықтай технологиялық жаңалықтар енгізетін. Мысалы, Touch ID немесе Face ID сияқты функцияларды пайдалану үшін міндетті түрде жаңа модельге көшу қажет еді. Екіншіден, ескі құрылғылар бірнеше жылдан кейін баяу жұмыс істей бастайтын.

Бүгінде жағдай өзгерді. Қазіргі iPhone модельдері өте қуатты процессорлармен жабдықталған және бірнеше жыл бойы жоғары өнімділікті сақтай алады. Сонымен қатар Apple смартфондары бағдарламалық жаңартуларды ұзақ уақыт қабылдай береді. Сол себепті көптеген пайдаланушылар үшін жаңа модельге көшу қажеттілігі бұрынғыдай өзекті емес.

Зерттеулер қазіргі кезде iPhone қолданушыларының басым бөлігі құрылғыларын 3-4 жыл пайдаланып, содан кейін ғана жаңартатынын көрсетеді. Кейбіреулер тіпті бір телефонды 5-6 жыл бойы қолданады. Бұндай жағдай бұрын мүмкін емес болып көрінетін.

Сарапшылардың пікірінше, мұның басты себебі – смартфон технологиясының жетілуі. Қазіргі iPhone модельдері күнделікті міндеттердің барлығын оңай орындайды. Көп жағдайда адамдар жаңа телефонды өнімділік төмендегендіктен емес, экранның сынуы, зарядтау портының бұзылуы немесе батареяның тозуы сияқты техникалық себептермен ғана ауыстырады.Әсіресе, аккумуляторды ауыстыру құрылғының өмірін бірнеше жылға ұзартуға мүмкіндік береді. Көптеген пайдаланушылар жаңа телефон сатып алудың орнына батареяны ауыстырып, құрылғыны пайдалануды жалғастыра береді.

Тағы бір маңызды фактор – iPhone сапасының артуы. Мысалы, алғашқы модельдерде суға төзімділік мүлде болмаған. Ал бүгінгі iPhone құрылғылары IP68 стандарты бойынша қорғалған және 6 метр тереңдікте 30 минутқа дейін суға төтеп бере алады. Сонымен қатар Ceramic Shield технологиясы экранның беріктігін едәуір арттырды.

Бір қызығы, пайдаланушылардың құрылғыларды сирек жаңартуы Apple компаниясының табысына кері әсер еткен жоқ. Керісінше, компания жаңа қаржылық рекордтар орнатып келеді.

Сарапшылардың қорытындысы бойынша, смартфондар нарығы кемелдену кезеңіне өтті. Бұрын жаңа модель алу қажеттілік болса, қазір ол көбіне жеке таңдау мәселесіне, қаржылық мүмкіндікке байланысты. Сондықтан көптеген пайдаланушылар үшін iPhone-ның қалыпты қызмет ету мерзімі бүгінде 4-6 жылға дейін жетіп отыр.