Иран БАӘ мен Бахрейндегі АҚШ пен байланысы бар алюминий зауыттарына шабуыл жасады

АСТАНА, 29 наурыз – Sputnik. Иран әскері Таяу Шығыста АҚШ армиясымен байланысы бар екі алюминий зауытына шабуыл жасады, деп хабарлады Ислам революциясы сақшылар корпусының (ИРСК) баспасөз қызметі.

"ИРСК-нің әскери-әуе және әскери-теңіз күштері бірлескен операция барысында өңірдегі АҚШ-тың әскери және әуе-ғарыш өнеркәсібімен байланысы бар екі өнеркәсіп нысанына соққы берді. Атап айтқанда, БАӘ-дегі EMAL алюминий зауыты мен Бахрейндегі ALBA алюминий зауытына шабуыл жасалды", - делінген мәлімдемеде.

Корпус мәліметінше, EMAL әлемдегі ең ұзын алюминий өндіру желісіне ие және жылына 1,3 миллион тонна өнім шығарады.

АҚШ пен Израильдің Иранға қарсы операциясы бір айдан бері жалғасып келеді. Осы уақыт ішінде тараптар бір-біріне соққы беріп жатыр. Қақтығыстың ушығуы Ормуз бұғазы арқылы кеме қатынасының толық тоқтауына әкеліп соқтырды.

Кеше Иранның күштік құрылымдарындағы дереккөз РИА Новости агенттігіне Тегеранның әскери әрекеттерді тоқтатуды жоспарламайтынын және шабуылды күшейтуге дайын екенін мәлімдеген.