Израиль премьері Газаға 153 тонна бомба тасталғанын растады

Израиль премьер-министрі Биньямин Нетаньяху атысты тоқтату режиміне қарамастан, Газа секторына жасалған соңғы әуе шабуылдары кезінде израильдік әскер 153 тонна бомба қолданғанын мойындады. Бұл туралы ол Израиль парламентінің ашық отырысында мәлімдеді, деп хабарлайды АА.

Премьердің айтуынша, кеше жасалған шабуылдар салдарынан Газаның әртүрлі аудандарында 44 палестиналық қаза тапқан. Сөз барысында ол: «Бітім ХАМАС-қа Израильге қауіп төндіруге құқық бермейді. Біздің елге қарсы кез келген әрекет ауыр салдарға әкеледі», — деді.

Нетаньяху ХАМАС-ты бітім талаптарын бұзды деп айыптап, атысты тоқтату кезінде екі израильдік сарбаздың қаза тапқанын жеткізді. Оның сөзінше, осы оқиғалардан кейін Газа аумағындағы ондаған нысанға соққы жасалған.

Бұған дейін Израиль тарапы Рафах қаласында ХАМАС жасаған деп болжанған шабуылға жауап ретінде Газаның бірнеше аймағын бомбалағанын хабарланды. Алайда ХАМАС-тың әскери қанаты атысты тоқтату шарттарын сақтап отырғанын және Рафахтағы оқиғаларға қатысы жоқ екенін мәлімдеді.

Палестиналық дереккөздер Рафахтағы қақтығыстардың ХАМАС пен Израиль әскері қаруландырған, Ясир Абу Шебаб басқаратын топ арасында болғанын алға тартты.

Әуе соққыларынан кейін Израиль әскері атысты тоқтату режимінің қайта күшіне енгенін жариялады.

Бүгін, 12:06