Кадрлық шешім жұмысқа тың серпін беруі керек : Президент Үкіметтегі өзгерістер туралы айтты

Қазақстан Президенті Қасым-Жомарт Тоқаев сайлау учаскесіне барып, дауыс бергеннен кейін тілшілердің сұрақтарына жауап берді, – деп хабарлайды Aikyn.kz сайты.

Atameken Business телеарнасының тілшісі Саяна Санақова Мемлекет басшысынан Құрылтай сайлауынан кейін жасақталатын жаңа Үкіметтің бағыт-бағдары мен міндеттері туралы сұрады.

Президенттің айтуынша, Үкімет отставкаға кетеді және оның құрамында бірқатар өзгеріс болады. Бірақ Мемлекет басшысы қазіргі Үкіметтің жұмысына сын айтуға негіз жоқ екенін атап өтті.

Atameken Business телеарнасының тілшісі Саяна Санақова: «Заңға сәйкес, Құрылтай сайлауынан соң Үкімет жұмысын тоқтатуға тиіс. Соған сай Министрлер кабинеті жасақталады. Жаңа Үкіметтің бағыт-бағдары мен міндеттері жөнінде не айтасыз?»,-деп сұрақ қойды.

Бұл сұраққа Президент: 

– Жалпы, Үкімет барынша табанды, жедел жұмыс атқарып, Мемлекет басшысы қойған міндеттерді орындап отыр. Дүние жүзіндегі бәсекелестік күшейіп келеді. Нарықтың сын-қатерлеріне мұқият назар аударып, ең бастысы, тиісті деңгейде төтеп беруіміз керек. Әлбетте, Үкімет отставкаға кетеді. Үкімет құрамында бірқатар өзгеріс болады. Ашығын айтқанда, дәл бүгін Үкімет жұмысына алаңдауға немесе оған сын айтуға қандай да бір негіз жоқ. Министрлер де, Үкімет жетекшісі де қолдан келгенше міндеттерін атқарып жатыр. Бірақ кадрлық өзгерістер әрдайым болады. Өйткені бұл Үкіметтің жұмысына қан жүгіртеді. Мәселе біреуді орнынан босатуда емес. Мен жай сылтаумен жұмыстан шығаруға қашанда қарсымын. Әсіресе, қазіргі тілмен айтқанда, медиадағы контент немесе мазмұн үшін ауыс-түйіс жасаудың қажеті жоқ. Кадрлық шешім шын мәнінде жұмысқа тың серпін беруі керек. Бәріміз айтып жүрген жаңғыру үдерісі үздіксіз жүргізілуге тиіс. Өйткені бұл күрделі процесті алға жетелеп отыру қажет. Бұл істе Үкімет маңызды рөл атқарады,-деп жауап берді.