Каспийдегі трагедия: қаза тапқан әскери қызметшілердің отбасыларына кім және қалай көмектесуде

Каспий теңізіндегі оқу-жаттығу кезінде 14 әскери қызметші қаза тапқаннан кейін мемлекет, қайырымдылық қорлары, кәсіпкерлер, депутаттар, партиялар, банктер мен әуекомпаниялар марқұмдардың отбасыларына көмек көрсетілетінін жариялады. Tengrinews.kz 29 қыркүйекке дейін жарияланған қолдау шаралары туралы ақпаратты жинақтады.

Мемлекет

Үкіметтік комиссия мемлекет қаза тапқан әскери қызметшілердің отбасылары алдындағы барлық міндеттемесін орындайтынын, ал заңда қарастырылған төлемдер кідіріссіз берілетінін мәлімдеді.

Біржолғы өтемақы мөлшері марқұмның мәртебесіне байланысты. Келісімшарт бойынша қызмет атқарған әскери қызметшінің мұрагерлеріне соңғы атқарған лауазымы бойынша бес жылдық ақшалай қамтылым мөлшерінде өтемақы беріледі.

Мерзімді қызметтегі әскери қызметшінің, сондай-ақ курсанттың, кадеттің, резервтегі әскери қызметшінің немесе жиынға шақырылған әскери міндеттінің мұрагерлеріне 500 айлық есептік көрсеткіш төленеді. 2026 жылы бұл 2 162 500 теңге.

Бұдан бөлек, заңда әскери қызмет міндеттерін атқару кезінде алған жарақат салдарынан қаза тапқан әскерилердің отбасы мүшелеріне ай сайынғы төлемдер қарастырылған. Мүрделерді тасымалдау, жерлеу және құлпытас орнату шығындарын қаза тапқандар қызмет еткен ведомство өз мойнына алады.

Әр отбасына жауапты маман бекітілуі тиіс. Сондай-ақ жақындарына материалдық және психологиялық көмек көрсетіледі.

Қазақстан Халық кеңесі

Қазақстан Халық кеңесінің мүшелері бастапқыда 815 миллион теңге көлемінде көмек көрсетілетінін хабарлады. Бұл сома 12 әскери қызметшінің қазасы ресми расталып, тағы екеуін іздеу жұмыстары жалғасып жатқан кезде аталған болатын.

Бұл ретте Андрей Лаврентьев пен Шахмұрат Мүтәліп қаза тапқан әрбір отбасына 25 миллион теңгеден бөлуге ниетті екенін мәлімдеді. Қаза болғандар саны 14-ке жеткен соң, кеңес жаңартылған жалпы соманы жария түрде атаған жоқ.

Қайырымдылық қорлары

Halyk қайырымдылық қоры мен Болат Өтемұратов қоры 14 отбасының әрқайсысына 25 миллион теңгеден көмек берілетінін жариялады. Осылайша, әр қор 350 миллион теңгеден қолдау көрсететінін мәлімдеді.

Сондай-ақ Halyk Bank қаза тапқан мерзімді қызметтегі әскери қызметшілердің банк алдындағы берешегін есептен шығаратынын хабарлады.

Депутаттар мен саяси партиялар

"Әділет" партиясы мен оның Іскерлік кеңесінің мүшелері қаза тапқан және зардап шеккен әскерилердің отбасыларына 1,5 миллиард теңге бөлінетінін мәлімдеді.

Құрылтай депутаттары қаза тапқандар мен зардап шеккендердің отбасыларына өз қаражаттарынан 146 миллион 650 мың теңге бағыттауды ұйғарды.

Respublica партиясы қаза тапқандар мен зардап шеккендердің отбасыларына 100 миллион теңге бөлінетінін хабарлады. "Ақ жол" партиясындағы шағын және орта бизнес кәсіпкерлері 50 миллион теңгеден астам қаражат жинаған.

Бизнес және банктер

Beles құрылыс компаниясы 100 миллион теңге бөлетінін жариялады. Бірқатар қазақстандық басылым Bank RBK-ға сілтеме жасап, қаза тапқандар мен зардап шеккендердің отбасыларына 20 миллион теңге көмек берілетінін хабарлады, алайда банктің ресми сайтында бұл туралы хабарлама жоқ.

"ҚазМұнайГаз" компаниялар тобы отбасыларға қажетті қолдау көрсететінін айтты, бірақ көмектің көлемі мен форматын нақтыламады.

Микроқаржы ұйымдары қауымдастығының өкілдері де қаза тапқан әскерилер мен олардың отбасы мүшелерінің несиелерін тексеретінін және берешек болған жағдайда оны есептен шығаруға ниетті екенін мәлімдеді.

Әуекомпаниялар

Air Astana мен FlyArystan қаза тапқан және аман қалған әскери қызметшілердің жақын туыстарына, сондай-ақ зардап шеккендерге тегін билеттер ұсынды.

Арнайы қор арқылы көмек көрсету

25 қыркүйекте Маңғыстау облысының әкімдігі көмек жинау бойынша бірыңғай оператор ретінде "Ұлттық рух" қоғамдық бірлестігін белгіледі. Қаражатты бөлу үшін арнайы комиссия құрылды.

26 қыркүйекте комиссия басшысы Бекмұрат Жүсіпов қажетті қаражат көлемі жиналғанын және жинау аяқталғанын мәлімдеді.

Бұл ретте 29 қыркүйектегі жағдай бойынша қорға нақты түскен сома жарияланған жоқ. Сондай-ақ 14 отбасының әрқайсысы нақты қанша алатыны және ақшаны аудару басталды ма, жоқ па хабарланбады.

Жалпы қанша көмек жарияланды?

Егер жария түрде айтылған сомаларды арифметикалық түрде қоссақ, 3,43 миллиард теңгеден асады. Ал Қазақстан Халық кеңесі екі мүшесінің әр отбасына 25 миллион теңгеден төлейтіні туралы уәдесі барлық 14 отбасына қатысты екенін ескерсек, есептелген көлем шамамен 3,53 миллиард теңгеге дейін ұлғаяды.

Алайда бұл соманы түпкілікті деп санауға болмайды. Оның қомақты бөлігі қаза тапқандардың отбасыларына ғана емес, зардап шеккен әскери қызметшілерге де бағытталған. Барлық мәлімдеме ақша аударылғанын білдірмейді: кейбір хабарламаларда бөлінген қаражат туралы айтылса, енді бірінде көмек көрсету ниеті туралы сөз болған. Қаражаттың бір бөлігі арнайы қор арқылы, ал бір бөлігі тікелей отбасыларға жолданып жатыр. Кейбір кәсіпкерлер бір мезгілде саяси партияларға, Қазақстан Халық кеңесіне және басқа да бірлестіктерге мүше болғандықтан, жекелеген сомалар қайталануы мүмкін.

Бізді Google-дың негізгі дереккөздер тізіміне қосыңыз

Қосу