Келер жылдан бастап зейнетақы жарнасын төлеу тәртібіне өзгеріс енбек

Қазақстан Үкіметі міндетті және кәсіптік зейнетақы жарналарын есептеу мен аударудың жаңа ережелерін бекітті, – деп хабарлайды Aikyn.kz сайты.

Жаңа талаптарға сәйкес, енді кәсіптік зейнетақы жарналары қызметкердің барлық ай сайынғы табыс түрлерінен – Салық кодексінде көрсетілген кірістердің негізінде есептеледі. Алайда салықтан босатылған төлемдер бұл есепке кірмейді.

Өзін-өзі жұмыспен қамтығандар мен интернет арқылы табыс табатындар үшін де міндет жүктеледі. Өзгерістер енді жеке кәсіпкерлерге, өзін-өзі жұмыспен қамтыған тұлғаларға және интернет-платформалар арқылы табыс табатын азаматтарға да қатысты. Олар Бірыңғай жинақтаушы зейнетақы қорына (БЖЗҚ) жарналарды есепті айдан кейінгі 25-не дейін аударуға тиіс.

Қарызы барларға бақылау күшейтіледі. Міндетті немесе кәсіптік зейнетақы жарналары бойынша берешек 6 айлық есептік көрсеткіштен (АЕК) асқан жағдайда, мемлекеттік кірістер органдары 5 жұмыс күні ішінде хабарлама жібереді. Қарыз өтелмесе, тағы 10 жұмыс күні ішінде борышкердің банктік шоттары мен кассалық операциялары уақытша тоқтатылуы мүмкін.

Зиянды еңбек жағдайы бар қызметкерлер үшін бұрынғы тәртіп сақталады. Мұндай қызметкерлердің зейнетақы жарналарын жұмыс беруші өз есебінен ай сайын аударуға бұрынғыша міндетті.

Бұл өзгерістер азаматтардың зейнетақы жинақтарын жүйелі түрде толықтыруды және әлеуметтік қорғалуын арттыруды көздейді.