​Көкшетауда әлеуметтік үйлерді салуға бөлінген миллиардтар жымқырылған: Күдікті қамауға алынды

Сурет: ҚМА

Қаржылық мониторинг агенттігінің (ҚМА) Ақмола облысы бойынша департаменті Көкшетау қаласындағы құрылыс жобаларын іске асыру кезінде бюджет қаражатын жымқыру фактісі бойынша тергеп-тексеру жүргізуде. Іс прокуратураның үйлестіруімен қолға алынды.

1 миллиардтық келісімшарт

Анықталғандай, 2021 жылғы желтоқсанда «Көкшетау қаласының құрылыс бөлімі» ММ мен «Айдана-ИК» ЖШС арасында маңызды келісімшарт жасалған. Құжат бойынша мердігер компания әлеуметтік осал топтарға арналған көппәтерлі тұрғын үйлер салуы тиіс болған. Келісімшарттың жалпы сомасы 1 миллиард теңгеден асады.

Жалған құжаттар және орындалмаған жұмыс

Тергеу мәліметтеріне сәйкес, мердігер компания бюджеттен аванстық төлемдерді алу үшін қулыққа басқан. Олар азаматтық-құқықтық жауапкершілікті сақтандыру бойынша жалған шарттар ұсынған. Осыдан кейін тапсырыс беруші тарапынан ЖШС шотына 211 миллион теңге көлемінде қаражат аударылған.

Алайда серіктестік құрылыс жұмыстарын толық көлемде орындамаған. Нәтижесінде халық асыға күткен баспана нысандары уақытында пайдалануға берілмей қалды.

Ақша қайда кеткен?

Мемлекеттен алынған миллиондаған бюджет қаражаты мақсатты түрде жұмсалмаған. Мәлім болғандай, бұл ақша:

Жеке қажеттіліктерге;Контрагенттермен есеп айырысуға;Қолма-қол ақшаға айналдыруға жұмсалған.

Қазіргі жағдай: Осы іс бойынша күдікті азамат қамауға алынды. Қазіргі уақытта тергеп-тексеру амалдары жалғасып жатыр. ҚР Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жариялауға жатпайды.

Бүгін, 10:40