Көрнекті қаламгерге арналған кездесу

Осыған орай «AMANAT» партиясының Жамбыл облыстық филиалы «Кітап-AMANAT» партиялық жобасы аясында «Әдеби мұра – ұрпаққа аманат» атты әдеби кездесу ұйымдастырды.

Мұндағы мақсат – қазақ әдебиетінің дамуына елеулі үлес қосқан қаламгердің шығармашылығын насихаттау, жас ұрпақты рухани құндылықтарға баулу және ұлттық әдебиетке деген қызығушылықты арттыру.

Сөз басында М.Дулати атындағы Тараз универ­ситетінің профессоры, филология ғылымдарының докторы, әдебиеттанушы Сәмен Құлбарақ қаламгердің өмірі мен шығармашылығына, адами болмысы мен азаматтық келбетіне тоқталды. Оның айтуынша, жазушының дүниетанымына, қаламгерлік болмысына әкесі Шаштайдың тәрбиесі ерекше ықпал етті.

«Қазақ әдебиетіндегі қарапайым да шынайы қаламгерлердің бірі – Жұмабай Шаштайұлы. Оның шығармаларындағы кейіпкерлер бейнесінен әкесінің қарапайым қойшы, күйге жақын өнерлі жанның әсерін анық байқауға болады. Жазушы жиі көтеретін тақырыптар – қойшылық, қарттық, күйшілік өнер – осының дәлелі. Мәселен, «Қоңыр» атты әңгімесі – осы айтқандарымыздың нақты көрінісі. Оның әрбір туындысынан адам жанының терең психологиялық иірімдерін көре аламыз. Кейіпкердің ішкі күйін, жан толғанысын, рухани болмысын көркем тілмен шебер суреттейді. Бұл – жазушының қаламгерлік шеберлігінің көрінісі. Сонымен қатар Жұмабай Шаштайұлы жүргізген «Үзеңгі жолдас» телебағдарламасында да қоғам қайраткерлерінің болмысын ашып, өткір сұрақтарымен көрерменге жаңа қырынан таныта білді», – деді ол.

Жастармен өткен кездесуде Қазақстан Жазушылар одағының мүшесі, жазушы-журналист Баймаханбет Ахмет Жұмабай Шаштайұлының Жамбыл облысы Қордай ауданында қызмет атқарған кезеңін ерекше атап өтті. Ол сол жылдары шыққан «Еңбек туы» (қазіргі «Ақ жол») газетінде жарияланған мақалаларын жиі оқып, жазушының журналистика саласындағы еңбегімен ерте кезден таныс екенін жеткізді.

«Жазушымен таныстығымызға қарымды қаламгер, Қазақстанның еңбек сіңірген қайраткері, «Алаш» әдеби сыйлығының лауреаты Несіпбек Дәутайұлы себеп болды. Облыстық газетте қызмет етіп жүрген кезімде Жұмабай Шаштайұлы Несағаны іздеп жиі келетін. Жеке сырластығымыз болмағанымен, арада үлкен сыйластық орнады. Сол себепті оның әрбір еңбегін қалт жібермей оқып жүретінмін. Ол жур­налистика мен прозаны терең меңгерген тұлға еді. Қаншалықты қарапайым болса да, ешқашан қарабайыр болмады», – деді ол.

Ал белгілі прозашы Ардақ Үсейінова жазушы мен «Алаш» әдеби сыйлығының лауреаты Несіпбек Дәутайұлы арасындағы достықты ерекше атап өтті. Оның айтуынша, қос қаламгердің тағдырында көп ұқсастық бар. Екеуінің де әкесі қойшы болғандықтан, олар бала күнінде қой бағып, білім алуға кештеу қадам басқан. Бұл ортақ тағдыр олардың арасындағы рухани жақындық пен достықты бекемдеген. Ардақ Үсейінованың айтуынша, Жұмабай Шаштайұлы сынды қаламгер ешқашан ұмытылмайды.

Расында, Жұмабай Шаштайұлы – ұлттық әдебиеттің рухани ізденісін тереңдеткен көрнекті қаламгер. Оның шығармалары қазақ прозасындағы экологиялық және моральдық мәселелерді жаңа көркемдік деңгейде көтере білді. Қазіргі заман адамының рухани дағдарысын ұлттық дүниетаным тұрғысынан көрсете отырып, оқырманға ой салды. Сонымен қатар жазушы тіл мәдениеті мен көркемдік дәстүрдің жалғастығын сақтап, қазақ прозасының көркемдік аясын кеңейтуге зор үлес қосты.

О.ЖОЛДЫБАЙ