Көрнекті жазушыны еске алды

Түркістанда көркемсөз бен көсемсөздің шебері, көрнекті қаламгер, халықаралық «Алаш» әдеби сыйлығының лауреаты Мархабат Байғұттың 80 жылдығы аясында өткен тағылымды іс-шарада «Мақамы бөлек Мархабат» атты кітап таныстырылды.

Түркістан облысы әкімдігінің қолдауымен, «Farab» ғылыми әмбе­бап кітапханасы, «Медиакратия» қоғамдық бірлестігі және «Мар­хабат» журналының ұйымдас­тыруымен өткен басқосуға қаламгер­лер, қоғам қайраткерлері мен жас­тар, жазушының жақын туыста­ры қатысты. «Мақамы бөлек Марха­бат» атты жинаққа енгізілген естелік­тер, ғылыми мақалалар мен толға­ныстар классик жазушының шығармашылық ерекшеліктерімен бірге адами болмысын жан-жақты аша түскен. Қазақ әдебиетінде өзіндік орны бар көрнекті қаламгер Мархабат Байғұт осыдан үш жыл бұрын 26 қарашада пәни дүниеден өткен еді. Жиында жазушының аяулы жары Қыздаркүл Пернебайқызы, інісі Нышан Байғұтов, ұлы Нұрлан жүрекжарды лебіздерін білдірді. Қаламгерлер атынан Сейдолла Сады­қов, Асхан Майлыбаева, Роза Нарымбетова сағынышты сырға толы естеліктер айтты. «Miras» қоғамдық кеңесінің төрағасы Халима Жантөреқызы, осы кеңестің мүшесі, әйгілі айтыскер ақын, «Алтын домбыра» иегері Бекарыс Шойбеков те оқырманға ой тастар пікірлерін ортаға салды. Облыстық мәдениет басқармасының басшысы Әзімхан Қойлыбаев жазушының мұрасын дәріптеудің маңызына тоқталды. «Мархабат» журналының бас редакторы, республикалық жазба ақындар байқауында топ жарып жүрген, болашағынан үлкен үміт күттіретін жас талантты ақын, Мархабат Байғұт атындағы сыйлықтың лауреаты Сезім Мергенбай жазушыға арнаған жырын оқыды.

Тек қазақ елі емес, күллі түркі әле­міне кеңінен танылған, мықтылығы мойындалған кемеңгер тұлғаның шығармалары әлем елдері тіліне аударылған. Әлі де аударыла бермек. Мәселен, алдағы аптада Өзбекстан астанасы Ташкент қаласында өзбек тіліндегі аудармасының кезекті тұсаукесері болады. Кезекті деп отырғанымыз Мархабат Байғұттың туындылары бұған дейін де өзбекшеге аударылған болатын. Жиын барысында «Медиакратия» қоғамдық бірлестігінің Алғысхаты «Мархабат Байғұттың туғанына 80 жыл» жобасы аясындағы бірқатар іс-шараның жоғары деңгейде өтуіне атсалысқан «Farab» ғылыми әмбебап кітапханасының директоры Жанат Шардарбековаға тапсырылды. 

Айта кетелік, «Мархабат Байғұт­тың туғанына 80 жыл» жобасы аясын­дағы мазмұнды әрі мағыналы іс-шаралар жыл бойы атқарылды. Әуелі «Мархабат» журналының ақпарат айдынына желкен керіп шығуына байланысты қаңтар айында Шымкенттегі Әл-Фараби атындағы кітапханада зиялы қауымға таныстырылды. Көктемде «Мақамы бөлек Мархабат» атты халықаралық симпозиум өтті. Түркия, Өзбекстан, Қырғызстаннан және Қазақстан Жазушылар одағының басшылық құрамы, айтулы қаламгерлер, мемлекет және қоғам қайраткерлері, Парламент депутаттары, ақпарат құралдарының жетекшілері, ғалым­дар, әдебиет сыншылары қатыс­қан алқалы жиын түңлігі алдымен Түркістанда түрілді. Ертеңіне Шымкентте халықаралық жиын жалғасын тапты. Үшінші күні ауқымды іс-шара жазушының туған жері – Түлкібас ауданында «Таупістелі тағлымы» форумы­ның төртінші мәрте ұйымдастыры­­луы­­на ұласты. Облыс көлемінде «Марха­бат оқулары» шығармашылық байқауы бірнеше айға созылып, өте тартысты өтті. Оған 720 талапкердің қатысуы біраз жайтты аңғартады. Ал классиктің публицистикасы мен прозасын талдап, таразылаған жастар, студенттер арасындағы байқауда еліміздің 7 өңірінен үміткерлер бақ сынады. Байқаулардың жүлдегерлері симпозиумда марапатталды. Жазу­шы Нұрғали Ораздың Марха­бат Байғұт өмірін өрнектеген драма­тургиялық шығармасының үзінді­сі сол халықаралық симпозиум­да қойылды. Келер жылы Түркістандағы театрда толық нұсқасы сахналанып, қалың көрерменге ұсынылмақ.

Мархабат Байғұттың 80 жылдық мерейтойына орай өткізілген іс-шаралардың қорытындысы іспетті өткен бұл жиында жазушы еңбегін дәріптеу, жан-жақты насихаттау алдағы уақытта да тұрақты түрде жалғасатыны айтылды. Әсіресе Оңтүстікте Мархабат Байғұт атын­дағы Әдебиетшілер үйін ашу – көптің қалауы. Қарапайым оқырманнан бас­тап еліміздегі, түркі дүниесіндегі Жазушылар одағы басшылығы, қалам ұстаған қауым осы орынды ұсынысты бірауыздан қолдап отыр.

Түркістан облысы