Астанада көрнекті ақын Несіпбек Айтұлын еске алу кеші өтті

Астанада көрнекті ақын, Мемлекеттік сыйлықтың лауреаты Несіпбек Айтұлын еске алу кеші өтті.

Шара ақынның 75 жылдық мерейтойына орай ұйымдастырылды. «Дариға Дәурен» атты мәдени кешке ақынның үзеңгілес достары, жұбайы мен отбасы, шәкірттері және жыр сүйер қауым қатысты.

Осы бір шерлі өлеңді дүниеге әкелген қазақтың қабырғалы ақыны Несіпбек Айтұлының дүниеден озғанына 2 жылдан аса уақыт болды. Қаламгер тірі болса биыл 75 жылдығын тойлар еді. Амал нешік? Заманында заңғар Мұқағалидың өзі үміт артқан ақын абыройлы аманатты арқалап өтті. Осылай деген зиялы қауым өкілдері жүрекжарды лебіздерін білдіріп, әсерлі естеліктерімен бөлісті.

Тұрсын Жұртбай, филология ғылымдарының докторы, профессор:

- Жүрегім құс боп ұшып кетті менің, Дариғай артыңда қалып барам дегендей, Несіпбектің жаны жәннатқа ұшып кетсе де, мұнау қазақ даласында қалықтап әні қалды.

Дәулеткерей Кәпұлы, Қазақстанның еңбек сіңірген қайраткері, Халықаралық «Алаш» әдеби сыйлығының иегері

- Бүгінгі «Дариға Дәурен» атты Несіпбек ағамыздың әдеби-сазды кешінің ұйымдыстырылуы да Несіпбек ағаның ұлт алдындағы борышы өтелгендігінің белгісі. Сондықтан халқының бағын жырлаған, ұлтының руханиятын шексіз сүйген, елінің намысын оятатын, бабалар рухын көтеретін жырларды дүниеге әкелген Н. Айтұлы шыныменде халықтың, ұлттың деңгейіндегі ақын екенінің дәлелі осы.

Кеш барысында Несіпбек Айтұлына арналған жырлар оқылды. Ақынның сөзіне жазылған әндер шырқалды.

Ерасыл Қалқаманұлы, ақынның немересі:

- Несіпбек атам өмірін адал еңбекке арнаған, балаларына қамқор, немерелеріне ақылшы, жүрегі кең, адамгершілігі мол жан. Оның өткен жолы парасаттылықтын, сыршылдықтың үлгісі.

Әкем де осы қара өлең, Шешем де осы қара өлең, Қара өлеңім тұрғанда, Қалай ғана мен өлем деп жырлаған Несіпбек Айтұлы бүгін ортамызда жоқ. Десе де артында қалың ел тұрғанда ақынның сөзі өлмейді, ұрпақтан-ұрпаққа тарап мәңгі жасайды. Бүгінгі кеш соның айқын дәлелі. 

Әлішер Әли, Қанат Махмұтов