Алаш қаласы Несіпбек Айтұлын еске алды

Қазақтаннан шыққан тұңғыш әйел композитор кім? Білесіз бе? Ол Мәскеудегі Чайковский атындағы мемлекеттік консерваторияны тәмәмдаған тұңғыш қазақ қызы. Ол тіпті опера, балет, фильм музыкасына да әйелдер арасынан алғаш болып үн қосты. «Әке көрген оқ жонар, шеше көрген тон пішер» дейді қазақ. Бұл әйгілі Ахмет Жұбановтың қызы – Ғазиза Ахметқызы Жұбанова.

Бүгін әке аманатына адал, әке жолын жалғаған композитордың туған күні. Жұбановтар әулетінен шыққан қыз шығармашылық диапазоны кең композитор ретінде ғана емес, музыка саласында ұлттық кадрлар легін даярлаған білікті ұстаз ретінде де еңбегі ұшан-теңіз. Биыл композитордің туған күніне орай туған жері Ақтөбеде І республикалық «Жігер» аспаптық музыка фестивалі ұйымдастырылды. Байқауға Астана, Алматы, Қызылорда, Ақтөбе қалаларынан музыкалық оқу орындарының студенттері мен камералық жанрдағы кәсіби орындаушылары қатысып, «Камералық ансамбль», «Фортепиано ансамблі» номинациялар бойынша бақ сынады.

Алаш қаласы Несіпбек Айтұлын еске алды

Алаш қаласы Несіпбек Айтұлын еске алды. Семей жұрты шаһарда шайырдың 75 жылдығына орай «Сәуле ғұмыр» атты әдеби сазды танымдық кеш өткізді. Кеш барысында зиялы қауым жүрекжарды лебіздерін білдіріп, естеліктерін айтты. Несіпбек Айтұлына арналған жырлар оқылды. Ақынның сөзіне жазылған әндер шырқалды.

Белгілі сыншы, композитор Тұрсынжан Шапайдың әніне жазылған осы бір шерлі өлеңді дүниеге әкелген қазақтың қабырғалы ақыны Несіпбек Айтұлының дүниеден озғанына 1 жылдан аса уақыт болды. Қаламгер тірі болса биыл 75 жылдығын тойлар еді. Заманында заңғар Мұқағалидың өзі үміт артқан ақын үлкен аманатты арқалап өтті. Кеште «Дариға-ай» жастар театры ақынның шығармашылығына арналған қойылым ұсынды.  

Рамазан Стамғазы, Қазақстанның еңбек сіңірген әртісі:

- Нес аға мына талантты адамды, талантты композиторды алыстан байқап қоятын, алыстан танып қоятын. Бұл кісінің ең кереметі әншіге керек әуенге буын-буынымен сөз жазатын. Әншіге, мысалы, кейбер ақындар жабық дыбысты жазып берсе, бұл кісі ашық дыбыста жазып, ақын әншінің кеудесін ашатын. Бұл кісінің ең танымды дүниесі үлкен болсын, кіші болсын, кез келген адамның тілін де табатын, үнін де табатын.

«Жекпе-жек айтыс» жартылай финалға өтті

«Хабар» арнасы ұсынған жекпе-жек жартылай финалға өтті. Торғайлық айтулы ақын Айбек Қалиев ширек финалда айтыстың «киллері» Бекарыс Шойбековпен сөз жарыстырды. Қос ақын да тақырыпқа сай жол-көлік оқиғасы, жүргізушінің жолда жүру тәртібі жайлы жырлады. Нәтижесінде Айбек Қалиев жартылай финалға өтіп, Еркебұлан Қайназаров, Дидар Қами және Жансая Мусинаның қатарына қосылды. Енді «Хабар» Агенттігі алдағы сенбі қалың көременге жартылай финалдың жекпе-жектерін ұсынады. Ал жеңімпаз 21 желтоқсан күні анықталады. Айта кетейік, айтыстың негізгі мақсаты – қазақтың өткені мен бүгінін ұштастыра отырып, түрлі тақырыптар мен мәселелерді қозғау, айтыс өнерінің мәртебесін көтеру.

«Қыз Жібек» драмалық операсы

Енді афишаға келейік. Осы апта Қаллеки театры ұлтымыздың інжу-маржаны «Қыз Жібек» туындысын драмалық опера жанрында сахналайды. Бұл көрермен үшін таңсық емес, әрине. Дегенмен қалың жұртшылық 1934 жылдан бері әр түрлі жанрда жарық көріп келе жатқан бұл шығармадан жалыққан да емес. Драма, кино, мюзикл түрінде де көрерменін тауып келеді. Театр ұжымы ә дегеннен-ақ бұл спектакльдің бедері бөлек болатынын айтады. Әуелгі ерекшелік шығарманың сахналық сарапталуы мен жанрында. Сөйтіп, патша көңіл көрермен үшін бүгін Қаллеки театрының үлкен залы есігін айқара ашып қойды.