Күрделі жөндеуден кейін ашылған вокзалдардың тізімі жарияланды

АСТАНА, 2 шілде – Sputnik. Көлік министрлігі күрделі жөндеуден кейін ашылған теміржол вокзалдарының тізімін жариялады, деп хабарлайды Sputnik Қазақстан ведомствоның ресми сайтына сілтеме жасап.

Бұған дейін Қазақстанда тарихта алғаш рет жүздеген теміржол вокзалын жаңарту жұмыстары басталған болатын. Бүгінде соның нәтижесінде 30 вокзал күрделі жөндеуден кейін пайдалануға берілді. Олар:

Ауыл және Белағаш вокзалдары (Абай облысы);

Курорт-Бурабай, Шортанды, Макинка және Ақкөл (Ақмола облысы);

Ганюшкино және Аққыстау (Атырау облысы);

Семиглавый Мар, Қазақстан және Шыңғырлау (Батыс Қазақстан облысы);

Қарағанды-Сортировочная, Жаңа Қарағанды және Нұра (Қарағанды облысы);

Аманқарағай және Құсмұрын (Қостанай облысы);

Жаңақорған, Қазалы, Шиелі және Талап (Қызылорда облысы);

Қонаев және Шамалған (Алматы облысы);

Талдықорған (Жетісу облысы);

Тайынша, Жаңаесіл және Саумалкөл (Солтүстік Қазақстан облысы);

Риддер және Шемонаиха (Шығыс Қазақстан облысы);

Бозшакөл платформасы (Павлодар облысы).

Жөндеу барысында ғимараттардың қасбеттері, шатырлары, жылу жүйелері, сумен жабдықтау, желдету, ауаны баптау, өрт қауіпсіздігі және бейнебақылау жүйелері жаңартылып, энергия үнемдейтін витраждар орнатылды. Отандық құрылыс материалдарына басымдық берілді.

"Ерекше назар кедергісіз орта қалыптастыруға аударылды. Вокзалдарда пандустар, лифтілер, бейімделген кіреберіс аймақтары мен санитарлық тораптар, тактильді жолақтар және арнайы касса аймақтары жабдықталды. Нысан санатына қарай ана мен бала бөлмелері, медициналық пункттер, сақтау камералары қарастырылып, жолаушылар ағынын тиімді ұйымдастыру үшін ішкі кеңістіктер қайта жоспарланды", – дейді министрлік мамандары.

Сонымен қатар жолаушылар платформалары, вокзал маңы алаңдары мен инженерлік инфрақұрылым да жаңартылған.

Айта кетері, Қазақстандағы теміржол вокзалдарының басым бөлігі 1950-1970 жылдары салынған, ал кейбірі 80-100 жылдан астам уақыт бойы пайдаланылып келген. Көпшілігі ондаған жыл бойы күрделі жөндеуден өтпеген.