Кванттық есептеулер ЖИ ден кейінгі технологиялық революцияға айналады

CNBC телеарнасының ақпаратына сүйенген Aikyn.kz кванттық компьютердің коммерциялық қолданысқа енуін бағалайды. 

Amazon-ның жасанды интеллект және кванттық технологиялар жөніндегі жетекшісі Питер ДеСантистің айтуынша, алғашқы коммерциялық тұрғыдан пайдалы кванттық компьютерлер 5-7 жыл ішінде жасалады. Ол жасанды интеллект модельдері, арнайы чиптер және кванттық есептеу жүйелерімен айналысады. Оның пікірінше, кванттық технологиялардың дамуы кезінде жартылай өткізгіштер индустриясында байқалған заңдылық қайталануы мүмкін.

«Менің ойымша, алдағы бес-жеті жылда алғашқы коммерциялық тұрғыдан пайдалы шағын кванттық компьютерлерді көре бастаймыз», – деді ол CNBC арнасына берген сұхбатында.

Сарапшының айтуынша, кейін бұл салада «Мур заңы» тәрізді қарқынды даму басталады. Яғни жүйелер жыл сайын күрделеніп, бұрын шешілмейтін есептерді орындауға қабілетті болады. Көпшілік арасында кванттық компьютерлер қарапайым компьютерлерден әлдеқайда жылдам болады деген түсінік қалыптасқан. Алайда ДеСантис бұл пікірдің толық дұрыс еместігін атап өтті.

«Кванттық компьютер барлық есептерді тез шешпейді. Ол тек классикалық компьютерлер қиындықпен орындайтын өте ерекше мәселелерді әлдеқайда тиімді шеше алады», – дейді Amazon өкілі.

Қазіргі компьютерлер ақпаратты нөл немесе бір мәнін қабылдайтын биттер арқылы өңдейді. Ал кванттық жүйелер кубиттерді пайдаланады. Кубит бір мезетте бірнеше күйде бола алады, бұл күрделі есептеулерді орындауға жол ашады.

Amazon бұл саладағы бәсекеде жалғыз емес. Кванттық технологияларды дамытуға Google, Microsoft, IBM және ондаған стартап миллиардтаған доллар инвестиция құюда. Өткен жылы Amazon қателерді түзету мәселесін шешуге арналған Ocelot атты кванттық чипін таныстырды.

Сарапшылардың болжамдары әртүрлі. Google өкілдері практикалық кванттық қосымшалар 5 жыл ішінде пайда болады деп есептейді. Microsoft 2029 жылға қарай коммерциялық кванттық машинаны іске қосуды жоспарлап отыр. Ал Nvidia басшысы Дженсен Хуанг былтыр пайдалы кванттық компьютерлердің пайда болуына кемінде 15 жыл қажет болуы мүмкін деген пікір айтқан. ДеСантистің ойынша, кванттық компьютерлердің алғашқы маңызды қолданылу салалары химия мен материалтану болады. Себебі қазіргі суперкомпьютерлердің өзі кейбір молекулалық процестерді дәл модельдей алмайды.

«Бүгін біз көптеген ғылыми процестерді жеткілікті дәлдікпен есептей алмаймыз. Кванттық компьютерлер пайда болған кезде химия мен жаңа материалдар жасау саласында үлкен серпіліс болуы мүмкін», – дейді ол.

Сарапшылардың пікірінше, кванттық есептеулер жасанды интеллектен кейінгі келесі технологиялық революцияға айналуы ықтимал.