Лондондағы рейс кезіндегі төбелес күтпеген жалғасын тапты

Лондоннан Лас-Вегасқа бағыт алған British Airways рейсінің бортында екі жолаушы арасында төбелес шықты. Стюардесса жанжалды өз бетінше тоқтатуға тырысқан, оқиғаның видеосы әлеуметтік желілерде тарап кетті, деп хабарлайды Tengri Travel.

Не болды?

Еxpress Daily басылымының мәліметінше, оқиға Лондонның Хитроу әуежайынан ұшып шыққан British Airways рейсінде болған. 31 жастағы жолаушы ішімдікке сылқия тойып алып, өзін агрессивті ұстай бастаған және ұшақ салонында төбелес шығарған.

Куәгерлер түсірген кадрлардан ер адамның қарсыласына бар күшімен ұмтылғаны көрінеді. Ашуға мінген жолаушылардың жолында тек Софи есімді стюардесса тұрып, ол төбелесушілерді ажыратуға және оларды экипаж нұсқауларын орындауға көндіруге тырысты.

Кадрларды ұшақ жолаушыларының бірі түсіріп алған - БАҚ мәліметінше, ол диджей болып шықты. Кейінірек ер адам осы роликтегі стюардессаның дауысын өзінің музыкалық сетінде пайдаланған.

@bou_dnb STAY SEATED (the breakdown) #fyp ♬ original sound - Bou

Ролик 360 мыңға жуық қаралым жинады. Желі қолданушылары стюардессаны нағыз қаһарман деп атап, алкоголь тұтыну ережелерін қатайтуға шақырды.

"Ол - нағыз батыр", "Әуежайларда және ұшақ бортында ішімдік ішуге тыйым салу керек", "Жарайсың, Софи. Оның жалақысын көтереді деп үміттенемін", "Мұндай әрекет үшін өмір бойы ұшуға тыйым салу қажет", - деп жазды пікір қалдырушылар.

Кейбіреулер әуекомпанияны стюардессаның еңбегін ерекше атап өтуге шақырды.

Лондон полициясының мәліметінше, оқиға 6 тамыз күні сағат 17:30 шамасында ұшақ бортында болған. Тәртіп сақшыларына мас күйінде болып, өзін дөрекі ұстаған 31 жастағы жолаушы туралы хабарлама түскен.

"Полиция қызметкерлері бортқа шығуы үшін ұшақ терминалға қайта оралды", - деді полиция өкілі.

British Airways мұндай мінез-құлыққа жол берілмейтінін, ал жолаушылар мен экипаж қауіпсіздігі әуекомпанияның басты басымдығы болып қала беретінін мәлімдеді.

Айта кетейік, мас жолаушылар қатысқан бірқатар оқиғалардан кейін еуропалық авиакомпаниялар ережелерді қатайта бастады. Мысалы, британдық TUI Airways авиакомпаниясы 1 қарашадан бастап алкогольдік ішімдіктерді ақылы етеді.

Google News арқылы жаңалықтарымызды қадағалаңыз