Людоедтің мұрасы бәскеге түседі Алматыда Коспаевтың ҰҚТ ның жылжымайтын мүлкі сатылып жатыр

Алматыда қаланың ең беделді аудандарының бірі – Esentai City-ден төрт нысан сатылымға шығарылды. Кейбірінің бағасы миллиард теңгеге жуықтайды. Бұл пәтерлер кімге тиесілі болғаны, олардың қазіргі сипаты және не себепті тәркіленгені туралы толығырақ Tengrinews.kz материалында.

Саудаға қандай мүлік шығарылды?

Электрондық сауда порталында төрт лот орналастырылды. Олардың барлығы Esentai City тұрғын үй кешенінде орналасқан және тәркіленген мүлік болып саналады. Қазіргі таңда нысандар Қаржы министрлігінің Мемлекеттік мүлік және жекешелендіру комитетіне тиесілі.

Нысандардың орналасу сызбасы. Фото e-qazyna.kz сайтынан

Лоттардың бірі – Алматыдағы ауданы 455,3 шаршы метр болатын тұрғын емес жай. Ол Медеу ауданы, Нұрлан Қаппаров көшесі, 124-үй, 8-нысан мекенжайында орналасқан. Лот құжаттарында нысанның тек мынадай фотосуреттері бар:

Саудаға шығарылған нысан. Фото e-qazyna.kz сайтынан

Нысан 887 миллион теңгеге бағаланды. Ол дәл осы бағаға сатылымға қойылған. Аукцион бағаны көтеру әдісімен өтеді.

Саудаға шығарылған нысанның бағалануы. Фото e-qazyna.kz сайтынан

Сауда-саттық 25 тамыз күні сағат 10:00-де өтеді.

Екінші нысан жақын маңда – Нұрлан Қаппаров көшесі, 124-үй, 7-нысан мекенжайында орналасқан. Сыртқы көрінісі жағынан ол алдыңғы нысаннан айтарлықтай ерекшеленбейді.

Саудаға шығарылған нысан. Фото e-qazyna.kz сайтынан

Алайда оның ауданы едәуір кіші – 125,5 шаршы метр. Ал бағасы 251 миллион теңге. Бұл нысан бойынша сауда 19 тамыз күні сағат 10.00-де өтеді.

Келесі лот – Нұрлан Қаппаров көшесі, 138-үй, 11-нысан мекенжайындағы ауданы 194,5 шаршы метр болатын жай. Құны – 385 миллион теңге. Нысанның көрінісі мынадай:

Саудаға шығарылған нысан. Фото e-qazyna.kz сайтынан

Сауда-саттық 19 тамыз күні сағат 10:00-ге белгіленген.

Бұл тізімдегі ең қымбат нысан – Нұрлан Қаппаров көшесі, 124-үй, 6-тұрғын емес жай мекенжайында орналасқан. Мұнда 448 шаршы метр аумақ 966 миллион теңгеге сатылымға шығарылған. Сауда-саттық бұл нысан бойынша да 19 тамыз күні сағат 10:00-де өтеді.

Саудаға шығарылған нысан. Фото e-qazyna.kz сайтынан

Әрбір лотта жылжымайтын мүліктің ауыртпалықтары (шектеулері) бар екені көрсетілген. Сатып алушы нысанды өз бетінше қайта рәсімдеп, мүмкін болатын шектеулерді шешуге және салықтар, айыппұлдар мен басқа да төлемдер бойынша қарыздар болса, оларды өтеуге міндетті болады.

Бұл ретте комитет сатып алушы мен үшінші тұлғалар арасында туындауы мүмкін дау-дамайларға жауап бермейтінін ескертеді.

Бұл "Людоедтің" мүлкі ме?

Бұл нысандардың барлығы ұйымдасқан қылмыстық топтың (ҰҚТ) басшысы Елдос Қоспаевтан тәркіленген. Ол қылмыс әлемінде "Людоед" деген лақап атпен танымал. Бұл деректер Tengrinews.kz иелігіндегі құжаттармен расталады.

Мінекей, Елдос Қоспаевқа қатысты істердің бірі бойынша сот құжаттарынан үзінді:

Елдос Қоспаевқа қатысты үкім

Елдос Қоспаевқа қатысты үкім

Қоспаевтың қылмыстық тобы қалай жұмыс істеді?

Қоспаевтың қылмыстық тобы 11 адамнан тұрды және олар бопсалаумен, бизнесті рейдерлік жолмен басып алумен айналысқан. Міне, олардың бір бөлігі:

Видеодан алынған кадр

Топты қылмыс әлемінде "Людоед" деген атпен танымал Елдос Қоспаев басқарған. Оны Қазақстанның экс-президенті Нұрсұлтан Назарбаевтың марқұм інісі Болат Назарбаевтың сенімді адамы деп те атаған.

Қылмыстық схема қарапайым болды: топ мүшелері табысты бизнесті таңдап алып, оның иелеріне қысым көрсете бастаған. Қорқыту, бопсалау және өзге де қысым көрсету әдістері арқылы кәсіпкерлерді бизнесін топқа қажетті адамдардың атына аударуға мәжбүрлеген.

2025 жылы қылмыстық топтың басшысы Елдос Қоспаев Қылмыстық кодекстің 10 бабы бойынша кінәлі деп танылды. Жиынтық жаза ретінде ол 15 жылға бас бостандығынан айырылды.

Оның сыбайластары келесі мерзімдерге сотталды:

Айдос Қоспаев 12 жылға бас бостандығынан айырылды. Руслан Шалин 12 жылға бас бостандығынан айырылды. Ерлан Имашев 12 жылға бас бостандығынан айырылды. Дастан Әбіжанов 12 жылға бас бостандығынан айырылды. Камардин Алымов 12 жылға бас бостандығынан айырылды. Рауан Бабаев 12 жылға бас бостандығынан айырылды. Оксана Кудряшова 10 жылға бас бостандығынан айырылды. Алексей Кузнецов 12 жылға бас бостандығынан айырылды. Василий Бабушкин 9 жылға бас бостандығынан айырылды.

Олардың барлығы ҰҚТ-ға қатысу, бизнесті рейдерлік жолмен басып алу, бопсалау, алаяқтық, ақшаны жылыстату, аса ірі көлемде мүлік ұрлау, заңсыз кәсіпкерлік, салық төлеуден жалтару, құжаттар мен акциздік маркаларды қолдан жасау, шекараны заңсыз кесіп өту, сондай-ақ жаңа рейдерлік басып алуларға дайындық жасау баптары бойынша кінәлі деп танылды. Сонымен қатар фигуранттардың бірі зорлау қылмысы үшін сотталған.

ҰҚТ бірнеше жыл бойы құрықталды

Қоспаев тобын жою жұмыстары 2022 жылы басталды. Сол кезде Қаржылық мониторинг агенттігі Елдос Қоспаев пен оның жақын сыбайластарына халықаралық іздеу жариялады. Қоспаевтың өзі және сыбайластарының бір бөлігі шетелге қашып кеткен болатын.

2023 жылдың қыркүйегінде Қоспаев пен топтың тағы алты мүшесі Солтүстік Кипрде ұсталды. Кейіннен олар Қазақстанға депортацияланды.

ҰҚТ мүшелеріне қатысты сот процесі екі жылға жуық уақытқа созылды.

Қаржылық мониторинг агенттігінің мәліметінше, жәбірленушілерге келтірілген шығын 18 миллиард теңгеден асқан. Сонымен қатар тергеу барысында топ мүшелеріне тиесілі делінген мүліктерге тыйым салынды: олардың қатарында 9 миллион долларға жуық қаражат, 102 пәтер, 6 жеке үй, 28 тұрғын емес жай, 11 жер учаскесі, автокөліктер және басқа да дүниелер бар. Жалпы алғанда 154 жылжымайтын мүлік нысанына тыйым салынып, 19 премиум-кластағы автомобиль тәркіленді.

Видеодан кадрлар

Істегі тағы бір ерекше жайт: тергеу мәліметтері бойынша, Қоспаев шатқалда өз "фазендасын" тұрғызып, онда арыстандар мен аюларды асыраған.

Видеодан кадрлар

Нәтижесінде олардан заңсыз жолмен келген барлық мүлік тәркіленді.

Мәселен, ұйымдасқан қылмыстық топқа қатысы бар Rolls-Royce Ghost Family автокөлігі сатылып кетті.

Қоспаевтың ҰҚТ-сына тиесілі Rolls-Royce Ghost Family. Фото e-Qazyna сайтынан

Ал мынау ҰҚТ басшысы әйелінің көлігі болуы мүмкін. Ол да бәссаудада сатылған.

BMW X7. Фото e-Qazyna сайтынан

Елдос Қоспаевтың жеке Range Rover көлігі де сот үкімінен кейін бірден сатылды.

Елдос Қоспаевтың Range Rover көлігі. Фото e-Qazyna сайтынан

Сот процестері аяқталды ма?

Қоспаевтың ҰҚТ-сына қатысты негізгі қылмыстық процесс аяқталды – топ мүшелері тиісті жазасын алды. Бірақ олардың әрекеттеріне байланысты сот талқылаулары әлі де жалғасып жатыр.

Қазіргі уақытта Қоспаевпен және топтың басқа да мүшелерімен тартып алынған компаниялардың бұрынғы иелері соттасып жатыр. Осындай процестердің бірі жәбірленушілердің айтуынша, ҰҚТ мүшелері тым төмен бағамен өздеріне қайта жаздырып алуға мәжбүрлеген бизнеске қатысты болып отыр.

Қоспаевтар бизнесті нақты қалай иемденді, оны қаншаға өткізуге мәжбүрледі және қазір сотта қандай сома талап етіліп жатыр – толығырақ келесі материалымызда.

Google News арқылы жаңалықтарымызды қадағалаңыз

Жазылу