Мәдениет министрлігі кинотеатрларға тексеру ұйымдастыра ала ма Балаева жауабы

– Министрліктің функцияларында жеке кәсіпкерлік субъектілері саналатын кинотеатрлардың қызметін бақылау жөніндегі өкілеттік жоқ. Сондай-ақ Кәсіпкерлік кодексіне сәйкес кәсіпкерлік субъектілерінің меншігіне қол сұғылмаушылық қағидатына кепілдік беріледі және мемлекеттің кәсіпкерлік субъектілерінің істеріне заңсыз араласуына тыйым салынады. Осыған байланысты министрлік кинотеатрларға кешенді тексеруді ұйымдастыра алмайды, - деді вице-премьер.

Оның дерегінше, бүгінде елімізде 404 кинозалы бар 100-ге жуық кинотеатр жұмыс істейді. Ал дамыған елдер деңгейінде киноның қолжетімділігін қамтамасыз ету үшін қажеттілік 2 000 залға бағаланады.

– Кинотеатрлардың басым көпшілігі ірі қалаларда орналасқан және өңірлерде, шағын қалалар мен ауылдарда жоқ. Соңғы 5 жылда отандық фильмдерге деген жоғары сұранысқа қарамастан залдар саны өскен жоқ, - деді ол.

Вице-премьер мәліметінше, жылына еліміздің кинотеатрларында 400-ге жуық фильм көрсетіледі. Оның ішінде 2021 – 31, 2022 – 60, 2023 – 79, 2024 – 94, 2025 103 Қазақстан киносы бар.

– Францияда (68 миллион халқы бар) шамамен 7 000 кинотеатр жұмыс істейді. Орта есеппен 10 мың тұрғынға 1 залдан келеді. Олар құрылысты мемлекеттік қолдаудың арқасында осындай деңгейге қол жеткізілген, - деді Аида Балаева.

Бұған дейін Қазақстанның Анталиядағы бас консулдығының бастамасымен, Қазақстан Мәдениет және ақпарат министрлігі мен Шәкен Айманов атындағы «Қазақфильм» киностудиясының қолдауымен қазақ киносының күндері Анталияда өткенін жазған едік.