Махмұт Сабырхан өзбекстандық екі дүркін Олимпиада чемпионымен айқасатыны айтылды

Бокстан екі дүркін әлем чемпионы Махмұт Сабырхан өзбекстандық атақты боксшы Хасанбой Дусматовпен жекпе-жек өткізуі мүмкін. Бұл туралы қазақстандық спортшының жеке бапкері Ильяс Оралбеков мәлімдеді, деп хабарлайды Vesti.kz.

Оның айтуынша, бұл кездесу 2028 жылы АҚШ-тың Лос-Анджелес қаласында өтетін Олимпиада ойындарында өтуі ықтимал.

- Ол (Дусматов) 55 келіге дейінгі салмақ дәрежемізге ауысады деп ойлаймыз. Бұл өте қызықты жекпе-жек болады деген ойдамын, - деді Оралбеков "Күнгей.кз" арнасына берген сұхбатында.

- Олар бір-біріне бойы, дене бітімі, антропометриялық жағынан ұқсас, бірақ Махмұт жас.

- Иә, ол жас. Бірақ Хасанбой оңай қарсылас емес. Ол жайдан-жай екі дүркін Олимпиада чемпионы болған жоқ. Ол Олимпиадада Баркер кубогын алған. Әлем чемпионы да атанған өте тәжірибелі боксшы.

- Егер бұл жекпе-жек өтсе, оны қалай жеңуге болады? Жаспен бе?

- Бұл жерде жастың рөлі маңызды емес. Махмұт өте шапшаң әрі соққыны көп жасайтын боксшы. Дусматов негізінен жанама соққыларға сенсе, Махмұт әртүрлі стильде жұдырықтасады: жоғарыдан да, төменнен де, жанынан да соққы жасай алады. Қажет болса, шегіне де алады, ал қажет болса, алға да шабуылдайды. Егер Махмуұт қысымға берілмей, өз мәнерінде жұдырықтасса жеңіске жетеді деп ойлаймын.

Айта кетейік, 2024 жылы Парижде өткен Олимпиадада 51 келіге дейінгі салмақта Дусматов қазақстандық Сәкен Бибосыновты төрешілер шешімімен жеңіп, алтын алған болатын.

Vesti.kz сайтын осы әлеуметтік желілерінде оқыңыздар

@vestisport @vestikzsport

Vesti-де Tik Tok та бар @vestikzsport