Малды қолдан жазып , миллиондарды иемденген: Қазақстанның оңтүстігінде жымқыру схемасы анықталды

Түркістан облысында мемлекеттік субсидияларды жымқырды деп күдіктелген бір топ тұлғаға қатысты қылмыстық істі тергеу аяқталды. Тергеу нұсқасы бойынша, бюджетке келтірілген шығын 103 миллион теңгені құраған, деп хабарлайды Tengrinews.kz Қаржылық мониторинг агенттігіне сілтеме жасап.

Схема қалай жұмыс істеген?

Тергеу мәліметінше, заңсыз схеманы жүзеге асыру үшін ресми түрде үшінші тұлғаларға тіркелген 4 ЖК, "Нұр-Келес" ЖШС және "Бимен С." ЖШС пайдаланылған. Оларға іс жүзіндегі бақылау берілген ЭЦҚ, мөрлер және банк шоттарына билік етуге арналған нотариалды сенімхаттар арқылы жүзеге асырылған.

"Аталған субъектілерді пайдалана отырып, ақпараттық жүйелерге ауыл шаруашылығы жануарларының сатып алынғаны және бар екендігі, сондай-ақ селекциялық жұмыстардың жүргізілгені туралы көрінеу жалған мәліметтер енгізілген, содан кейін субсидия алуға электронды өтінімдер рәсімделген", – деп хабарлады ҚМА.

Бюджеттен алынған ақшалай қаражат қолма-қол ақшаға айналдырылып, схемаға қатысушылар арасында бөлінген және жеке қажеттіліктеріне жұмсалған. Шығынның жалпы сомасы 103 миллион теңгені құрады. Сөз өңірдегі ауыл шаруашылығы тауарын өндірушілерді қолдауға және мал шаруашылығын дамытуға арналған қаражат туралы болып отыр.

Соттың санкциясымен күдіктілердің мүлкіне: 2 тұрғын үйге, 4 автокөлікке, тұрақ орны мен жер учаскесіне тыйым салынған.

Күдіктілердің бірі қамауға алынды, екіншісіне қатысты кепіл түріндегі бұлтартпау шарасы таңдалды.

ҚР Қылмыстық-процестік кодексінің 201-бабына сәйкес өзге ақпарат жария етуге жатпайды.

Бізді Google-дың негізгі дереккөздер тізіміне қосыңыз