Маңғыстаудың Мұнайлы ауданында кәріз жүйесі салынып жатыр

Маңғыстау облысының Мұнайлы ауданында экологиялық мәселені шешу мақсатында орталықтандырылған кәріз жүйесі жүргізіле бастады.

Енді  Дәулет ауылының тұрғындары көп жыл бойы қолайсыздық тудырып иісі мүңкіген қалдық шұңқырлардан біржола құтылмақ. Инфрақұрылымдық бастамаға республикалық және жергілікті бюджеттен 4 миллиардтан астам теңге бөлінді. Мамандардың айтуынша, жаңа жүйе іске қосылғаннан кейін ауылдағы санитарлық жағдай жақсарып, экологиялық қауіп айтарлықтай төмендейді.

Дәулет ауылының тұрғындары қолқаны қабатын жағымсыз иістен әбден мезі болған. Алексей Тайғараевтың айтуынша, маңайда ондаған жыл бойы сарқынды сулар ағызылып келген бірнеше ашық шұңқыр бар. Бұл нысандар сонау кеңес дәуірінен қалған.

Алексей Тайғараев, Дәулет ауылының тұрғыны:

- Бұл қалдық сулар жерге сіңіп болды. Ары қарай сіңетін жері жоқ. Бәленбай жыл, мысалға отыз жыл болған шығар бұның ағып жатқанына. «Теміржолсу» мекемесіне қарасты су кетіп жатқан. Енді біздің ауыл шетінен салынып жатқан, жаңадан салынып жатқан үйлердің бұл құдығын тесіп жатыр. Дәретханалар, септик дейміз соның бәрін тесіп, бұл мәселеде Дәулет ауылының тұрғындары зардап шегуде. 

Жергілікті атқарушы билік күрделі мәселе түбегейлі шешіледі деп отыр. Ауданда орталықтандырылған кәріз жүйесі салынып жатыр.  121 шақырым құбыр тартылып, 11 қуатты сорғы станциясы орнатыл  а.

Қыдырберген Балиев, Мұнайлы ауданы құрылыс, сәулет және қала құрылысы бөлімінің басшысы:

- Отыз мың тұрғынға кәріз жүргізілді. Барлық аулаға дейін жеткізілді, көп қабатты үйді де қамтамасыз етті. Жаңадан салынып жатқан көпқабатты тұрғын үйлердің барлығы қосылып, мәселені шешетін болады толықтай. Тек қана 11 насос қалды, соны қосу жұмыстары жүргізіліп жатыр, 95 пайызға аяқталды. 

Болашақта барлық ағынды су Ақтаудағы тазарту нысандарына жіберіледі. Орталықтандырылған кәріз жүйесін бір ай ішінде іске қосу жоспарланған. Ал ескі шұңқырлар санитарлық өңдеуден кейін толық көміледі. 

Қарлығаш Қасиетова, Тамара Степанова, Ренат Досалиев