Мектеп оқушысы қанша сағат ұйықтау керек министрлік кеңес берді

АСТАНА, 15 тамыз – Sputnik. Денсаулық сақтау министрлігі каникулдан кейін балалардың ұйқысын ретке келтіруге қатысты кеңес берді, деп хабарлайды Sputnik Қазақстан.

Бала неше сағат ұйықтауы керек

Жаңа оқу жылына дайындық мектеп формасын, рюкзак пен оқу құралдарын сатып алумен ғана шектелмейді. Баланың күн тәртібін алдын ала реттеу де аса маңызды. Әсіресе жазғы демалыс кезінде бала кеш жатып, кеш тұруға үйреніп қалған жағдайда ұйқыға жату және таңертең ояну уақытын біртіндеп ретке келтірген дұрыс. Баланың ұйқыға деген қажеттілігі жас ерекшелігіне қарай анықталады. Америкалық педиатрия академиясының нақты ұсынымдары да бар.

1 жасқа дейін – тәулігіне 12–16 сағат ұйқы;

1 жастан 2 жасқа дейін – 11–14 сағат;

3 жастан 5 жасқа дейін – 10–13 сағат;

6 жастан 12 жасқа дейін – 9–12 сағат;

13 жастан 18 жасқа дейін – 8–10 сағат ұйқы қажет.

Баланың күн сайын шамамен бір уақытта ұйықтап, бір уақытта оянғаны дұрыс. Толыққанды ұйқы ағзаның қалпына келуі үшін қажет және зейін, есте сақтау, эмоционалдық жағдай, сондай-ақ жаңа ақпаратты қабылдау қабілетін жақсартады.

1-сынып ерекше көңіл бөлу керек

Бірінші сыныпқа баратын баланың қалыптасқан күн тәртібі айтарлықтай өзгереді. Сондықтан мамандар бірінші сынып оқушыларына ұзақтығы екі сағатқа дейінгі қосымша күндізгі демалысты да қарастыруды ұсынады.

"Алғашқы апталардағы басты міндет – баланың жаңа күн тәртібіне біртіндеп үйренуіне көмектесу және оның қалпына келуіне жеткілікті уақыт беру", - дейді мамандар.

Мектеп режиміне алдын ала және күрт өзгеріссіз көшкен дұрыс.

Негізгі кеңестер:

күн тәртібін сақтау;

ұйықтар алдында гаджеттерді пайдалануды шектеу;

ұйқы алдында тыныш орта қалыптастыру (серуендеу, жылы душ қабылдау, кітап оқу немесе тыныш әңгімелесу);

бөлмені ұйқыға дайындау.