Мемлекет есебінен дәрі алатын азаматтардың шағымдары 18% ға азайды министрлік

АСТАНА, 15 мамыр – Sputnik. Қазақстанда мемлекет есебінен дәрі алатын азаматтар саны екі есеге жуық өссе, қаржыландыру көлемі үш еседен астам артты, деп хабарлады денсаулық сақтау министрлігі.

"Бүгінде 3,4 миллион қазақстандық тегін дәрі-дәрмекпен қамтамасыз етіліп отыр. 2018 жылы бұл көрсеткіш 1,9 миллион адамды құраған еді. Ауыр және сирек кездесетін аурулары бар пациенттерге ерекше көңіл бөлінуде. Соңғы жылдары пациенттер тегін дәрі алатын аурулар тізбесі 48-ден 121 позицияға дейін кеңейтілді", — деді денсаулық сақтау вице-министрі Тимур Мұратов.

Ведомствоның мәліметінше амбулаториялық дәрі-дәрмекпен қамтамасыз етуге бөлінетін қаржының көлемі 87,2 млрд теңгеден 2026 жылға қарай жоспарланған 337,4 млрд теңгеге дейін ұлғайған.

Сонымен қатар Бірыңғай дистрибьютор жұмысына да елеулі өзгерістер енгізілген. Байланыс орталығы тәулік бойы жұмыс істеу режиміне көшірілді, ал азаматтар үшін дәрі-дәрмектің бар-жоғы туралы жедел ақпарат алуға мүмкіндік беретін Telegram-бот іске қосылды.

"2026 жылдың бірінші тоқсанының қорытындысы бойынша шағымдар саны 18 пайызға — 13 мыңнан 11 мың өтінішке дейін азайған", - дейді вице-министр.

Жалпы осы бағытта енгізілген реформаның арқасында 2026 жылдың бірінші тоқсанында қосымша 50 млрд теңге үнемделді.