Мен мұны түс деп ойладым . Фельдшер Ұлдана Мырзуанның анасы сотта жылап жіберді

Қаза тапқан фельдшер Ұлдана Мырзуанның анасы Сәлима Ешенқұлова-Омарова бүгін сотта жауап берді. Мінберге жақындай бере әйел еңіреп жылап жіберді, деп хабарлайды Tengrinews.kz тілшісі.

Анасы сотта қызы қайғылы жағдайға тап болған күн туралы айтып берді.

"Сол күні мен Шымкентке азық-түлік алуға шығуым керек еді. Біз ауылдық жерде тұратындықтан, жақын маңда дүкен жоқ, ең жақынына дейін 20–30 минуттық жол. Таксиге отырып, қызыммен телефонмен сөйлестім. Ол шақыртуға келгенін, жұмысы біткен соң қайта хабарласатынын айтты", - деді Сәлима Ешенқұлова-Омарова.

Анасының айтуынша, Ұлдана әрбір шақыртудан кейін оған қоңырау шалып, сөйлесіп тұрған.

"Дүкенге кіріп, қажетті заттарды сатып алып, кассаға жақындаған 15 минуттың ішінде маған құдағиым - Әділеттің анасы хабарласты. Дауысынан қобалжу сезілді, содан бір жамандықты сезгендей болдым. Өйткені қызым алыста болған соң, кез келген ана баласы үшін алаңдайды", - деп жалғастырды Ұлдананың анасы.

Сондай-ақ ол Астанаға жетіп, аурухана палатасына кіргенде, қызының қай жерде жатқанын бірден түсіне алмағанын айтты.

"Бұл түсім деп ойладым. Тіпті қасымда жатқан өз қызымды тани алмадым. Ол жерде бірнеше адам болды. Қызыма барлық айтқым келген сөзімді айтып, оны сүйгім келді. Ол қоңыраудан кейін маған қайта хабарласуы керек еді ғой. Кейін жансақтау бөлімінің қызметкерлері: "Бұл жерде ұзақ тұруға болмайды" деп, мені сыртқа шығарып жіберді", - деді жәбірленуші қайтадан жылап жіберіп.

Әйелдің жағдайын ескере отырып, судья үзіліс жариялады. Сот отырысы бүгін сағат 15:00-де жалғасады.

Бұған дейін сотта Ұлдана Мырзуанның күйеуі Әділет Зейнел жауап берді. Ер адам жұбайы қайғылы жағдайға ұшыраған күн туралы баяндады. Сондай-ақ ол сотқа жұбайының қазасы туралы қалай білгенін және әкімдікте алған 20 миллион теңге туралы хабарлады.

18 тамызда Астананың қылмыстық істер жөніндегі ауданаралық сотында фельдшер Ұлдана Мырзуанның өліміне қатысты іс бойынша алдын ала тыңдау басталды. Істі судья Меруерт Абаева жүргізіп жатыр.

Процеске екі мемлекеттік айыптаушы Нұрдәулет Әбуов пен Саяжан Серікова, қаза тапқан фельдшер Ұлдана Мырзуанның анасы Сәлима Омарова және марқұмның жұбайы Әділет Зейнел қатысуда.

Бұған дейін оның адвокаты Мұрат Мәуметов журналистерге Әділет Зейнелдің жәбірленуші мәртебесінен Ұлдананың анасының пайдасына бас тартатынын айтты. Алайда кейіннен сот бұл өтінішті қанағаттандырудан бас тартты. Зейнелдің өзі журналистерге қандай да бір түсініктеме беруден бас тартты.

Сотталушылар орындығында қайғылы оқиға болған үйдің МИБ төрайымы Сәуле Жұбаниязова отыр. Өткен сот отырысында ол өзін кінәсіз деп санайтынын мәлімдеді.

Ұлдананың анасының адвокаты Нұрсұлтан Орынбековтің айтуынша, іс Қылмыстық кодекстің 254-бабы – "Міндеттерге адал қарамау" бойынша қаралып жатыр.

Тікелей көрсетілімді YouTube-арнамыздан көруге болады.

2025 жылғы 8 қарашада Астанада Тәуелсіздік даңғылы, 24 Б мекенжайындағы тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.

Бір пациенттің жағдайы өте ауыр болды, оған ота жасалды. Тағы екі адам жансақтау бөлімінде жатты, дәрігерлер олардың жағдайын ауыр деп бағалады. Қалған екі адам бөлімшеге орналастырылды, олардың жағдайы тұрақты деп бағаланды.

Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Олардың арасында бала, оның анасы және туысы болған. Ұлдана зардап шеккендерге қарай жүгірген кезде, "үстіне кірпіш мен кондиционердің бекіткіші құлаған". 18 қарашада ол ауруханада көз жұмды.

Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейін істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы мына материалда.

Google News арқылы жаңалықтарымызды қадағалаңыз