Мен табанды түрде қарсы тұрмақпын : Нетаньяху АҚШ тағы қиын келіссөздерге дайындалып жатыр

Израиль премьер-министрі Биньямин Нетаньяху әскери-саяси кабинет мүшелеріне АҚШ-тың израильдік күштерді бірнеше бағыттан шығару туралы талаптарына қарсы тұруға ниетті екенін мәлімдеді, - деп хабарлайды Tengrinews.kz Израильдің 13-арнасына сілтеме жасап.

Телеарна мәліметінше, Нетаньяху бұл мәлімдемені Америка Құрама Штаттарына сапары алдында жасаған.

Отырыстың егжей-тегжейімен таныс дереккөздер мәліметінше, Америка әкімшілігі Израильден Газа секторы, Сирия және Ливандағы күштерін әкетуді талап етіп отыр.

"Мен бұған табанды түрде қарсы тұруға ниеттімін. Мен оларға "жоқ" деймін", - деп келтіреді телеарна премьер-министрдің сөзін.

Телеарна дереккөзінің айтуынша, Израиль Газа секторындағы қазіргі позицияларына бақылауды сақтап қалмақ. Әңгіме "сары сызық" деп аталатын аймақтың шығысына қарай орналасқан аумақ туралы болып отыр.

Бұл сызық оқ атуды тоқтату туралы келісім аясында пайда болды. Ол жасалғаннан кейін Израиль әскерилері сектордың бір бөлігінен шегінгенімен, Газадан толықтай кеткен жоқ. Сары сызық іс жүзінде аумақты екіге бөлді: бір бөлігін Израиль армиясы бақылауда ұстап отырса, екінші бөлігі ХАМАС-тың бақылауында.

Израиль тарапы ХАМАС толық қарусызданбайынша және сектордағы топтың әскери инфрақұрылымы жойылмайынша, әскерді бұдан ары қарай шегіндірмейтінін мәлімдеп отыр.

Бұған дейін Associated Press жерсеріктен түсірілген суреттерге сілтеме жасай отырып, израильдік әскерилердің сары сызық бойымен ірі топырақ бөгетін салып жатқанын хабарлады. Бұл Израиль армиясы иелік етіп отырған аумақты Газа секторының ХАМАС бақылауындағы батыс бөлігінен физикалық түрде бөліп тұратын ұзын үйінді.

Израиль армиясы агенттікке қоршау құрылысын растағанымен, оның мақсатын егжей-тегжейлі түсіндірген жоқ. Іс жүзінде бұл бөгет сары сызықты жергілікті жерде бекітіп, сектордың екі бөлігі арасындағы еркін қозғалысты қиындатады.

Google News арқылы жаңалықтарымызды қадағалаңыз