Мобильді байланыс тарифтері қымбаттаса, операторлар абоненттерге 60 күн бұрын ескертуге тиіс

Қазақстанда мобильді байланыс қызметтерінің тарифтері өзгерген жағдайда абоненттерді алдын ала хабардар ету тәртібі өзгереді, – деп хабарлайды Aikyn.kz сайты.

Енді мобильді байланыс операторы тариф құнын көтеруді жоспарласа, абоненттерге бұл туралы кемінде 60 күнтізбелік күн бұрын хабарлауы тиіс. Бұған дейін ескерту мерзімі 30 күн болған.

Абоненттерге хабарлама олардың нөміріне SMS арқылы жіберіледі. Сонымен қатар оператор тарифтің өзгеретіні туралы ақпаратты өзінің интернет-ресурсында жариялауға міндетті.

Осылайша, тұтынушыларға жаңа тариф күшіне енгенге дейін екі ай уақыт беріледі. Бұл кезеңде олар өзгертілген шарттармен танысып, қажет болған жағдайда өзіне қолайлы тарифтік жоспарды таңдауға мүмкіндік алады.

Айта кетейік, жаңа талап операторлардың тарифтерді қайта қарау құқығын шектемейді. Яғни байланыс компаниялары қызмет құнын бұрынғыдай өзгерте алады. Алайда тарифтің қымбаттайтыны туралы абоненттерді кемінде 60 күн бұрын ескертуі қажет.

Жаңа тәртіп байланыс саласындағы заңнамаға енгізілген өзгерістерге сәйкес жүзеге асырылады.