Қазақстандықтар байланыс пен интернеттің іркілістері туралы хабарлады: операторлар не деді

Қазақстандықтар түрлі операторлардың мобильді байланыс пен интернет жұмысындағы ақаулар туралы хабарлап жатыр. Байланыс операторлары бұл жағдайға қатысты қандай пікір бергенін Tengrinews.kz материалынан оқыңыздар.

Мәселе неде?

Кейінгі күндері Tengrinews.kz редакциялық нөміріне шағымдар түсіп, әлеуметтік желілерде де тарап жатыр. Пайдаланушылар желінің жоғалып кетуі, интернеттің баяулығы туралы айтып жүр.

Оқырмандардың бір бөлігі Beeline жұмысына шағымданды. Солардың бірі:

"Айтып жібересіздер ме, бәрінде интернет, әсіресе Beeline қалыпты жұмыс істеп тұр ма? Үйдегі интернет мүлдем істемей қалды, мобильді интернет әрең істеп тұр. Сервистер техникалық ақау деп жатыр, ал колл-орталықтар мүлдем жауап бермейді".

Желідегі мәселелерге Altel пайдаланушылары да шағымданды. Жазбалардың бірі Threads желісінде жарияланды. Автор күн бойы желінің үнемі жоғалып, қайта пайда болғанын жазады.

Threads әлеуметтік желісінен скриншот

Tengrinews.kz сервистердің жұмысында іркілістер болған-болмағанын анықтау үшін барлық байланыс операторына сауал жолдады. Компаниялардың жауабына сүйенсек, жаппай іркіліс тіркелмеген. Барлық оператор дерлік өз желілерінің жұмысынан ешқандай ақау таппағанын хабарлады.

Beeline компаниясы Tengrinews.kz тілшісіне ішкі жүйелерді жоспарлы жаңарту жұмыстарын жүргізгенін хабарлады. Осыған байланысты кейбір функциялар уақытша қолжетімсіз болған.

"Кейбір операциялар, мысалы, тарифтік жоспарды ауыстыру, қосымша қызметтерді қосу және өшіру, сондай-ақ басқа да функциялар уақытша шектелді. Біз алдағы жұмыстар туралы клиенттерді алдын ала хабардар еттік", – деп хабарлады компания өкілдері.

Қазіргі уақытта байланыс пен мобильді интернетті қоса алғанда, негізгі сервистер штаттық режимде жұмыс істеп тұр деп атап өтті компаниядағылар.

"Кейбір қызметтерде, мысалы, мобильді қаржылық сервистер жүйесінде (мобильді теңгеріммен жасалатын операциялар) уақытша шектеулер болуы мүмкін. Сонымен қатар, біздің техникалық мамандарымыз тәулік бойы жүйелердің жұмысын мұқият қадағалап, туындаған мәселелерді мүмкіндігінше тез шешеді", – деп түсіндірді Beeline.

Компания шектеулердің клиенттерге қолайсыздық тудыруы мүмкін екенін мойындап, абоненттерге бонустар берілетінін хабарлады.

Altel/Tele2 операторлары кіретін "Мобайл Телеком-Сервис" ЖШС-нің баспасөз қызметі ресми сауал қажеттігін алға тартып, мәселеге қатысты бірден түсініктеме бермеді.

Кейінірек редакцияға олардың операторы тарапынан ешқандай іркіліс байқалмағаны хабарланды.

Kcell корпоративтік коммуникациялар бөлімі Kcell және Activ желілері штаттық режимде жұмыс істеп тұрғанын мәлімдеді.

"Компанияның техникалық мамандары олардың жұмысын үнемі бақылауда ұстайды", – делінген хабарламада.

"Қазақтелеком" АҚ баспасөз қызметі бәрі штаттық режимде жұмыс істеп тұрғанын айтты.

"Қазіргі уақытта "Қазақтелеком" желісінде жаппай апаттар мен мәселелер жоқ. Қызметтер штаттық режимде көрсетіліп жатыр", – делінген хабарламада.

Бұған дейін біз мобильді байланыс пен интернет сапасының нашарлауына сертификатталмаған сигнал күшейткіштер себеп болуы мүмкін екенін жазған едік. Цифрлық даму, инновациялар және аэроғарыш өнеркәсібі министрлігінің мәліметінше, мұндай құрылғылар базалық станцияларға кедергі келтіреді. Соның салдарынан байланыс сапасы тек құрылғы иелерінде ғана емес, көршілерінде де нашарлауы мүмкін.

Google News арқылы жаңалықтарымызды қадағалаңыз