Молдова ТМД құрамынан шығу туралы түпкілікті шешім қабылдады

Құжатты 101 депутаттың 60-ы қолдады. Олардың қатарында биліктегі «Әрекет және ынтымақ» партиясының өкілдері, сондай-ақ бірқатар өзге депутаттар бар. Ал коммунистер мен социалистер фракциялары бұл шешімге қарсы шықты.

Коммунистер партиясының жетекшісі Владимир Воронин ТМД-дан шығуды «ел үшін трагедия» деп атап, оның экономикаға теріс әсері болуы мүмкін екенін мәлімдеді.

Еске салсақ, Кишинев ТМД құрамынан шығу үдерісін осы жылдың қаңтарында бастаған. Сол кезде бұл шешімді үкімет мақұлдаған еді. Енді құжатқа ел президенті Майя Санду қол қоюы тиіс.

Молдова сыртқы істер министрі Михай Попшой бұған дейін елдің ТМД аясындағы барлық келісімдерден толықтай бас тартпайтынын айтқан. Оның айтуынша, экономикалық тұрғыдан тиімді немесе азаматтар үшін маңызды келісімдер, егер олар елдің Еуропалық одаққа ықпалдасу бағытына қайшы келмесе, сақталады.

Айта кетейік, Молдованың ТМД-ға қатысты ұстанымы 2020 жылғы президент сайлауынан кейін өзгере бастады. Сол кезде Майя Санду елдің Еуропалық одақпен интеграция бағытын жариялап, Достастық саммиттеріне қатысудан бас тартқан болатын. 2023 жылдан бері республика ТМД-ның 70-ке жуық келісімін денонсациялады.

Бұрынғы президент әрі социалистер партиясының жетекшісі Игорь Додон бұл қадамдарды сынап, Сандудың Ресеймен және ТМД-мен байланысты үзу саясатын халық мүддесіне қайшы деп бағалады.

Айта кетсек, осы жылғы қаңтар айында Молдова ТМД құрамынан шығатынын жариялады.