Молдова премьері ұстанымдары мен сеніміне байланысты отставкаға кетуге шешім қабылдады

Молдова премьер-министрі Александр Мунтяну отставкаға кететінін жариялады, деп хабарлайды Tengrinews.kz тілшісі.

Бұл туралы ол Facebook-тегі парақшасында мәлімдеді.

"Бүгін мен премьер-министр ретіндегі мандатымды аяқтаймын. Мен үкіметті басқару туралы ұсынысты үлкен жауапкершілікпен және жағдайды жақсы жаққа өзгертуге үлес қоса алатыныма нық сеніммен қабылдаған едім. Өз ұстанымым мен сеніміме сәйкес мандатымды бұдан былай атқара алмайтынымды түсінген сәтте, қызметтен кету туралы шешім қабылдадым", - деді жазды Мунтяну.

Ол әріптестеріне алғыс айтып, "қандай лауазымда, қай жерде болсын немесе мемлекеттік я жеке секторда қандай міндеттер атқарса да" елге қызмет етуді жалғастыра беретініне сендірді.

Александр Мунтяну 2025 жылғы 1 қарашадан бастап Молдова премьер-министрі қызметін атқарып келеді.

Молдова Конституциясына сәйкес, премьер-министрдің отставкасы бүкіл үкіметтің отставкаға кетуін білдіреді. Министрлер кабинетінің басшысы кеткеннен кейін, қазіргі үкімет жаңа құрам жасақталғанға дейін өз міндеттерін атқаруды жалғастырады. Содан кейін Президент парламенттік фракциялармен кеңесіп, премьер-министр лауазымына кандидат ұсынады. Ол парламенттің сенім вотумын алу үшін үкімет бағдарламасы мен құрамын таныстыруы тиіс. Жаңа үкіметті жасақтауға үш айға дейін уақыт беріледі, деп жазады жергілікті БАҚ.

Google News арқылы жаңалықтарымызды қадағалаңыз

Жазылу