Мұнай газ саласындағы отандық өндірушілерді қолдау қалайша күшейтілмек

Оның айтуынша, ірі мұнай-газ жобаларында елішілік құндылықты дамытудың тиімді жүйесін құруды қамтамасыз етудегі мемлекеттік саясатқа ерекше мән берілген. Осы бағытта министрлік ірі жобалардағы операторлармен бірлесіп жергілікті қамтуды дамытуда және операторлар жүргізетін сатып алуларға қазақстандық өндірушілерді барынша тартуды қамтамасыз етуде елеулі жұмыс жүргізді.

— Бірлескен күш-жігер бірқатар маңызды нәтижелерге қол жеткізілді. Біріншіден, Солтүстік Каспий, Қарашығанақ және Теңіз жобаларының тендерлік рәсімдеріне өзгерістер енгізілді. Жаңа ережелер бірқатар ынталандырушы тетіктерді, оның ішінде бірыңғай отандық өндірушіден сатып алу мүмкіндігін, сондай-ақ инвестицияға айырбастау үшін ұзақ мерзімді келісімшарттар жасауды ескерді, — деді Ерлан Ақбаров.

Сонымен қатар ол жергілікті қамтуды дамыту бағдарламалары бекітілгенін еске салды. Оның аясында тауарлардағы, жұмыстар мен көрсетілетін қызметтердегі елішілік құндылық үлесін жыл сайын арттырудың бірқатар нысаналы индикаторы, сондай-ақ отандық тауар өндірушілерді ынталандыруға және қолдауға бағытталған сатып алуды жүзеге асыру процесінің құралдары мен тетіктері қамтылған. Мұнымен қоса, операторлар өтінім беруден бастап келісімшарт жасасуға дейінгі барлық кезеңнің ашықтығын қамтамасыз ететін E-procurement электрондық сатып алу жүйесін іске қосты.

Айта кету керек, қазірдің өзінде қалыптасқан тәжірибемен министрлік отандық бизнестің мұнай-газ саласындағы ең ірі инвестициялық жобалардың қажеттіліктері туралы ашықтығы мен хабардар болуы үшін НКОК, КПО, ТШО мұнай-газ жабдығының сатып алынатын тауарларын көрсету үшін форумдар, семинарлар мен В2В кездесулер өткізеді.

Вице-министр басқа да жер қойнауын пайдаланушылардың сатып алуларындағы ішкі елдік құндылық үлесін арттыру шаралары қолға алынғанын айтты.

Осы ретте 2025 жылы жер қойнауын пайдалануға арналған 75 келісімшартқа өзгеріс енгізілді, соның аясында ішкі елдік құндылық үлесі тауарларда 40%-ға дейін, ал жұмыстар мен қызметтерде 80%-ға дейін ұлғайтылды. Күрделі жобалар бойынша жаңа келісімшарттарда жергілікті өнім берушілерді дамыту бағдарламаларын әзірлеу міндеттемелері қарастырылған.

Қол жеткізілген нәтижелер отандық инжинирингті одан әрі дамытуға негіз болатыны атап өтілді. Басымдықтардың қатарында — ұлттық инженерлік құзыреттерді нығайту, инжинирингтік қызметтерді оқшаулау және ірі мұнай-газ жобаларын іске асыруға қазақстандық компаниялардың қатысуын кеңейту бар.

Еске салсақ, былтыр шілде айында Энергетика министрлігі Теңіз, Қашаған және Қарашығанақ жобаларының операторларына отандық өндірушілерді тартуға бағытталған нақты стратегиялық міндеттер жүктеді.

Айта кетейік, жақында Солтүстік Каспий жобасында E-procurement электрондық сатып алу жүйесі енгізілгені мәлім болды.