​Наурызда КҚК арқылы мұнай экспорты төмендеуі мүмкін

Каспий құбыр консорциумы (КҚК) наурыз айына арналған CPC Blend маркалы мұнай экспортының жоспарын төмендету жағына қарай қайта қарады.

Reuters агенттігінің үш салалық дереккөзінің мәліметінше, тиеу көлемі бұрынғы кестедегі тәулігіне 1,7 млн баррельден 1,4–1,5 млн баррельге дейін азайтылған. Осылайша, төмендеу көрсеткіші шамамен 15%-ды құрауы мүмкін.

Агенттіктің екі сұхбаттасушысы нақтылағандай, жоспардың түзетілуі әрқайсысы 140 мың тонна болатын мұнайдың сегіз партиясынан бас тартылуымен байланысты. Олардың айтуынша, қолайсыз ауа райы және ұшқышсыз ұшу аппараттарының шабуыл қаупіне байланысты жиі жарияланатын дабылдар тиеу кестесін бұзып, CPC Blend экспортына кері әсерін тигізіп отыр.

Reuters мәліметінше, ақпан айында КҚК тәулігіне шамамен 1,1 млн баррель мұнай жөнелткен. Ол кезде көрсеткіштерге кестенің бұзылуы мен Теңіз кен орнындағы өндіріс мәселелері әсер еткен болатын. Қазіргі таңда Теңізде өндіріс көлемін қалпына келтіру жұмыстары жүріп жатыр.

Reuters атап өткендей, консорциум жөнелтілімдер бойынша жедел мәліметтерге түсініктеме бермейді. Қазақстанның Энергетика министрлігі де агенттік сауалына жауап берген жоқ.

Бүгін, 16:15