Қазақстан КҚК шектеулеріне байланысты мұнай экспорты үшін қосымша маршруттар іздестіруде

Каспий құбыр консорциумы (КҚК) тарапынан енгізілген уақытша шектеулерге байланысты Қазақстан мұнай экспортының қосымша бағыттарын қарастырып жатыр. Бұл туралы энергетика министрлігінің ресми өкілі Әсел Серікпаева айтты, деп хабарлайды Tengrinews.kz тілшісі.

Ведомство мәліметінше, шілдеде КҚК мұнай қабылдауды уақытша шектегендіктен, шикізаттың бір бөлігін басқа бағыттарға бұруға тура келген.

"Мұнай көлемінің бір бөлігі басқа тасымалдау бағыттарына, атап айтқанда Ақтау порты, Атасу - Алашанькоу бағыты, сондай-ақ Атырау - Самара бағыты бойынша қайта бағытталды", - деді Әсел Серікпаева.

Сонымен қатар Қазақстан экспорттың қосымша нұсқаларын зерделеп жатыр. Олардың қатарында Баку - Тбилиси - Джейхан мұнай құбыры, Каспий теңізі арқылы Әзербайжан аумағымен тасымалдау және Баку - Супса бағыты бар.

Бұл ретте Баку - Тбилиси - Джейхан мұнай құбыры арқылы қазақстандық мұнай қазірдің өзінде тасымалданып жатыр. Жеткізілім көлемі жылына шамамен 1,2 миллион тонна болады.

Энергетика министрлігінің деректеріне сәйкес, Әзербайжан аталған бағыт бойынша қазақстандық мұнайды қабылдау көлемін жылына 2,2 миллион тоннаға дейін арттыруға дайын.

Осылайша, Баку - Тбилиси - Джейхан бағыты бойынша жеткізілім көлемі жылына шамамен бір миллион тоннаға өсуі мүмкін.

Еске сала кетейік, былтыр желтоқсанда Қазақстан Каспий құбыр консорциумындағы шектеулер кезеңінде 300 мың тоннаға жуық мұнайды басқа бағытқа бұрған болатын. Мұнай экспорттық бағыттар бойынша: Германия, Қытай, Баку - Тбилиси - Джейханға, сондай-ақ Новороссийск және Усть-Луга порттары арқылы әрі қарай жеткізу үшін ҚТО жүйесіне бағытталды.

19 шілдеде Қара теңіздегі КҚК теңіз терминалында тиеу операциялары жүргізіліп жатқан кезде, ASIA және NISSOS IOS атты екі танкерге дрондар арқылы шабуыл жасалды. Бұл кемелер Қазақстанда өндірілген мұнайды тиеп жатқан болатын. Танкерлер бортында халықаралық экипаждар болды. Осы жағдайға байланысты Қазақстанның Энергетика және Сыртқы істер министрліктері мәлімдеме жасады.

Энергетика министрлігінің мәліметінше, кемелерге жасалған шабуыл салдарынан зардап шеккендер жоқ. ВПУ-1 және ВПУ-3 қашықтан айлақтау қондырғылары зақымданбаған.

Қазақстан Сыртқы істер министрлігі мұндай шабуылдарды елдің экономикалық мүдделеріне жасалған жол берілмейтін қолсұғушылық деп атады. Сондай-ақ ведомство серіктес мемлекеттерді мұндай әрекеттерді қатаң айыптауға және тиісті жауап шараларын әзірлеуге шақырды.

30 шілдеде КҚК теңіз терминалы айдынында дрондар тағы да екі танкерге шабуыл жасады. Салдарынан бір кемеде өрт шықты.

31 шілдеде Қазақстан Энергетика министрлігі кейбір БАҚ-та тараған Каспий құбыр консорциумының жұмысы толық тоқтауы мүмкін деген ақпаратқа қатысты түсініктеме берді. Сол кезде ведомство мұндай сценарий қарастырылып жатқан жоқ екенін атап өтті.

Google News арқылы жаңалықтарымызды қадағалаңыз