Қазақстан маусымда КҚК арқылы мұнай экспортын қысқартуы мүмкін

Қазақстан 2026 жылдың маусым айында Каспий құбыр консорциумы (КҚК) жүйесі арқылы мұнай экспортын азайтуды жоспарлап отыр.
Бұл туралы Bloomberg агенттігі хабарлады. Агенттік дереккөздерінің мәліметінше, экспорт көлемі тәулігіне 1,3-1,4 млн баррельге дейін төмендеуі мүмкін. Ал мамыр айында бұл көрсеткіш шамамен 1,7 млн баррель деңгейінде болады деп күтілген.

Экспорттың қысқаруына Қашаған кен орнындағы жоспарлы жөндеу жұмыстары себеп болып отыр.

Қазақстан Еуропа елдері үшін негізгі мұнай жеткізушілерінің бірі болып қала береді. Қазір Еуропадағы мұнай өңдеу зауыттары Таяу Шығыстан келетін жеткізілімдердің азаюына байланысты балама көздерді іздеп жатыр.

Энергетикалық нарықтағы қиындықтар авиация саласына да әсер ете бастаған. Атап айтқанда:
– әуе отынының бағасы қымбаттады;
– кейбір рейстер саны қысқаруда.

Бұған дейін Қазақстан Республикасының Энергетика министрлігі «Дружба» құбыры бағытының өзгеруіне байланысты 260 мың тонна мұнай қайта бөлінгенін хабарлаған еді. Оның 160 мың тоннасы КҚК жүйесі арқылы, қалған бөлігі Ресейдің Усть-Луга порты арқылы жөнелтілуі жоспарланған.