Нипах вирусы қауіп төндіруде: Азия елдері Үндістаннан келетін жолаушыларды тексере бастады

Үндістанның Батыс Бенгалия штатында адам өміріне аса қауіпті Нипах вирусының өршуі тіркелді. Аурудың таралуын болдырмау мақсатында Азияның бірқатар елдері Үндістаннан келетін жолаушыларды тексеруді күшейтті, деп хабарлайды Arasha.kz.

Тайланд Батыс Бенгалиядан рейстерді қабылдайтын үш әуежайда бақылау орнатты. Непал тек Катманду әуежайында ғана емес, сонымен қатар Үндістанмен арадағы құрлық шекара бекеттерінде де тексеру жүргізіп жатыр.

Сондай-ақ, Қазақстан, Қырғызстан және Өзбекстан билігі де шекара бекеттерінде медициналық бақылауды күшейтті.

Қаңтар айының басында Батыс Бенгалияда бес медицина қызметкері вирус жұқтырып, олардың бірі ауыр халде жатыр. Науқастармен байланыста болған 110-ға жуық адам карантинге алынды.

Нипах вирусы жануарлардан адамдарға жұғады. Қазіргі уақытта бұл ауруға қарсы вакцина немесе арнайы ем жоқ. Соның салдарынан өлім көрсеткіші өте жоғары — 40%-дан 75%-ға дейін.

Қырғызстан, Өзбекстан және Қазақстан шекарадағы бақылауды қатаңдатты. Сейсенбі күні Қырғызстанның Денсаулық сақтау министрлігіне сілтеме жасаған 24.kg агенттігі елде ауру жұқтыру жағдайлары тіркелмегенін хабарлады.

Қырғызстан Денсаулық сақтау министрлігі: «Дүрбелеңге негіз жоқ. Елдің денсаулық сақтау жүйесі кез келген эпидемиологиялық қауіпке жедел жауап беруге дайын», — деп мәлімдеді. Инфекцияның елге кіруіне жол бермеу үшін санитарлық бақылау күшейтілген.

Өзбекстан билігі: Елде аурудың жоқ екенін растап, шекарадағы бақылауды арттырды. Мамандардың айтуынша, бұл инфекцияның ел аумағына ену ықтималдығы өте төмен.

Ал, Қазақстан Санитарлық-эпидемиологиялық бақылау қызметтері шекара арқылы өтетін жолаушылардың денсаулығын жіті қадағалауға алды.