Нөсерден кейін Алматы өзендеріндегі жағдай қандай? ТЖМ жауабы

Нөсер жаңбырдан кейін ТЖМ бөлімшелері Алматыдағы сел жүруі мүмкін аумақтар мен өзендерді тәулік бойы бақылауды жалғастырып жатыр, - деп хабарлайды Tengrinews.kz тілшісі.

Нөсер жаңбырдан кейін ТЖМ бөлімшелері Алматыдағы сел жүруі мүмкін аумақтар мен өзендерді тәулік бойы бақылауды жалғастырып жатыр, - деп хабарлайды Tengrinews.kz тілшісі.

Ведомство мәліметінше, бүгін таңғы сағат 8:00-дегі жағдай бойынша қаладағы гидрологиялық ахуал тұрақты. Қазіргі уақытта өзендердегі су деңгейінің көтерілуі тіркелген жоқ.

Алдын алу шаралары аясында ТЖМ қызметкерлері жергілікті атқарушы органдармен бірлесіп, қорғаныс бөгеті маңындағы Ақсай өзенінің арнасын тазалау және нығайту жұмыстарын аяқтады.

ТЖМ мәліметінше, жүргізілген жұмыстардың нәтижесінде өзендегі су деңгейі айтарлықтай төмендеген.

Мамандар жағдайды бақылау үшін Үлкен Алматы және Кіші Алматы өзендерінің бассейндерін бақылауды жалғастырып жатыр.

Бүгін мореналық көлдер мен өзен бассейндерін әуеден тексеру жоспарланған. Бұл таулы аймақтағы жағдайды жедел бағалап, ықтимал қауіптерді дер кезінде анықтауға мүмкіндік береді.

Қазіргі уақытта бақылау бекеттерінде 130-дан аса қызметкер мен 20 техника жұмыс істеп жатыр. Мониторингке Алматы қалалық ТЖД, Құтқару қызметі, "Барыс" республикалық жедел-құтқару жасағы, "Қазселденқорғау" мамандары және полиция қызметкерлері жұмылдырылған. ТЖМ жағдай тұрақты бақылауда екенін мәлімдеді.

Еске салайық, 1 шілдеде Алматы тұрғындарына нөсер жаңбырға байланысты таулы аймақтарда сел жүру қаупі сақталып отырғаны туралы ескерту жасалған болатын. Наурызбай ауданында жергілікті құлақтандыру жүйесі іске қосылып, кейбір тұрғындардың ұялы телефондарына шұғыл ескерту хабарламалар жіберілді.

Сілтемесіз жаңалық оқисыз ба? Онда Telegram желісінде парақшамызға тіркеліңіз!