Оңтүстік Кореяда Қазақстанның атом өнеркәсібі үшін мамандар даярланып жатыр

Корей электр энергетика корпорациясының халықаралық магистратурасында грант негізінде қазақстандық Тамерлан Жұмагелдинов білім алуда. Бұл білім беру бағдарламасы тек теориямен шектелмей, тәжірибені де қамтиды. Студенттер жергілікті атом электр станцияларына барып, тәжірибеден өтеді. 

Ульсан қаласындағы екі жұмыс істеп тұрған атом электр станциясының арасында KINGS атты бірегей университет орналасқан. Бұл - Корей электр энергетика корпорациясының жанындағы Халықаралық атом энергетика магистратурасы. Мұнда АЭС мамандары дайындалады. Білім ордасын 2011 жылы Оңтүстік Кореяның бес ірі энергетикалық компаниясы құрған. Қазір магистратурада 18 елден келген болашақ атом саласының мамандары оқып жатыр. Тыңдаушылар атом электр станцияларын жобалауды, олардың қауіпсіздігі мен экономикалық тиімділігін талдауды, сондай-ақ мемлекеттік энергетикалық саясатты қалыптастыруды үйренеді.

Лим Хак Гю – KINGS президентінің міндетін атқарушы:

- Бағдарламамыз студенттерге тек теорияны ғана емес, сонымен қатар атом станцияларының виртуалды жобаларын іске асыруды да үйретеді. Олар көпұлтты топтарда жұмыс істей отырып, атом нысандарын жобалап, қауіпсіздік, экономикалық тиімділік және өзге де факторларды ескере отырып шешім қабылдайды.

KINGS магистратурасында грант арқылы Астанадан келген 23-жастағы Тамерлан Жұмагелдинов оқып жүр. Ол магистратураға дейін «Қазақстандық атом электр станциялары» компаниясында жұмыс істеген. Ресейдің дипломатиялық академиясы мен «Білім-инновация» лицейінің түлегі ағылшын тілінде еркін сөйлейді. Сондықтан іріктеуден оңай өтіп, грант иегері атанған. 2027 жылы магистратураны тәмамдаған соң, Тамерлан елге оралуды жоспарлап отыр.

Тамерлан Жұмагелдинов, KINGS магистранты :

- Корея атом энергиясын күнделікті өзі қолданатын, атом энергетикасы табысты ел. Біз атом электростанцияларының қауіпсіздігі, энергетика саясатымен инвестициялық талдау деген пәндерді оқимыз. Негізі сондай пәндер болашаққа Қазақстандағы ядролық жоспарларды іске асыруға көмек береді. 

Тамерлан Жұмагелдинов бұл оқу орнындағы алғашқы қазақстандық магистрант емес. 2021 жылы мұнда тағы бір отандасымыз білім алған. Қазақстандағы атом электр станцияларына кадрлар даярлау мәселесін еліміздің Пусандағы Бас консулы Аслан Аскар университет басшылығымен талқылады. KINGS өкілдері қазақстандықтарға есік әрдайым ашық екенін және ынтымақтастықты жалғастыратынын айтты. 

Авторлары: Владислав Цой, Ольга Лян