Оқушы қыз жансақтау бөлімінде: Алматыда мектептегі буллинг ісі тергеліп жатыр

Алматыда полиция жеке мектепте болған буллинг фактісі бойынша қылмыстық іс қозғады. Бұл мектепте оқушы қыз өз-өзіне қол жұмсамақ болып, жансақтау бөліміне түскен. Бұл туралы Halyqstan хабарлады.

Оқиға жайлы қыздың әкесі, алматылық Қанат Әміркін бұған дейін мәлімдеген. Оның айтуынша, ол ұзақ уақыт бойы QSI International School әкімшілігіне (Ашимов көшесінде орналасқан) баласына сыныптастары тарапынан жасалған қысымға байланысты шағымданған, алайда тиісті шара қолданылмаған.

Әкесінің сөзіне қарағанда, қызды сыныпта жиі мазақ еткен, ал мұғалім мұндай әрекеттерді тоқтатпаған. Оқиғадан кейін ол толық тергеу жүргізіп, кінәлілерді жауапқа тартуды талап ететінін айтты.

Алматы қалалық полиция департаменті қылмыстық істің Наурызбай аудандық полиция басқармасы тарапынан қозғалғанын хабарлады.

«Қажетті тергеу шаралары жүргізіліп жатыр. Барлық мән-жай толық әрі объективті анықталады. Құқықтық баға тергеу нәтижесі бойынша беріледі», — делінген полиция мәлімдемесінде.

Бұл жағдайды Білім министрлігінің Балалардың құқықтарын қорғау комитеті де бақылауға алды. Ведомствоның дерегінше, мектепке Алматыдағы Психологиялық қолдау орталығының мобильді тобы жіберілген. Оқушыға жеке психологиялық сүйемелдеу ұйымдастырылып, ауруханадан шыққаннан кейін динамикалық бақылау жасалады.

Балалар психологиясы саласындағы мамандар білім беру ұйымдарының буллинг жағдайларына дер кезінде әрекет етуге міндетті екенін атап өтеді. Отбасылық психолог әрі суицидолог Светлана Богатырева мектеп буллинг фактілерін тіркеп, білім органдарына хабарлап, алдын алу жұмыстарын жүргізуі тиіс екенін айтты.

Қазіргі уақытта тергеу жалғасуда.

Анықтама: Өмірлік қиын жағдайдан шығатын жол жоқ сияқты көрінген кезде тегін сенім телефондары мен психологиялық қолдау қызметтеріне хабарласуға болады: — сенім телефоны 111 — психологиялық қолдау қызметі 150 — сенім телефоны 1303

Кеше, 17:22