Оралда тұрғын үйлерге мағынасы терең муралдар салынды

Биыл Оралдың келбеті адам танымастай өзгерді.

Шаһардағы көп қабатты үйдің қабырғаларына елге танымал жазушылар мен спортшылар, өнер қайраткерлері бейнеленген суреттер салынды. Мағынасы терең муралдар тұрғындардың көңілінен шығып жатыр.  Жайық жағасындағы әсем қаланы тағы қандай жобалар күтіп тұр?

Ескендір Хасанғалиев, Жұбан Молдағалиев, Сәкен Ғұмаров, Қадыр Мырзалиев сияқты күллі қазаққа танымал қайраткерлер бейнесі Орал көшелерінен ойып тұрып орын алды. Көп қабатты үй қабырғаларына салынған муралдар алыстан "менмұндалап", бірден назарға ілігеді. Бұдан бөлек ұлттар достығы мен  мамандыққа, өнерге деген сүйіспеншілікті дәріптейтін туындылар бар. Тұрғындар мұндай өзгерісті жылы қабылдап жатыр.

Жанерке Жақсылықова, қала тұрғыны:

- Меніңше, мұндай муралдар қала тірлігіне айырықша бір мән беріп тұрғандай. Көшеде келе жатқанда бірден көзге түседі әрі керемет әсерге бөленесің. Кеудеңді қуаныш кернеп, туған қалаңды мақтан тұтасың. Өйткені мұндай өнер туындысын әр шаһардан кездестірмейсің. 

Бұл шығармашылық жұмыспен екі суретшілер тобы шұғылданып жүр. Қаладағы 10 муралдың бесеуін Дарья Полищук өз әріптестерімен салып шыққан. Мұндай ауқымды дүниеніің сызбасын жасау да оңай емес дейді олар. Әрқайсысында мәдениет пен ұлттық болмыс, туған өлкенің табиғаты үйлесуі тиіс. Сондықтан болар бір үйдің қабырғасын муралмен безендіруге екі аптадай уақыт кетеді.

Дарья Полищук, жоба жетекшісі:

- Біздің суретшілер тобы үшін биыл нағыз жемісті жыл болды десем артық емес. Павлодар, Ақтөбе, Рудный  қалаларында,  тағы бірнеше  елді мекенде жұмыс істедік. Жалпы ел бойынша 12 мурал салдық. Біз сурет салуда ең қымбат әрі сапалы бояуды қолданамыз. Себебі туындымыздың  әдемі ғана емес, ұзақ тұруына мән береміз.

Жайық жағасындағы жасыл шаһардың келбеті жыл сайын ажарланып келеді. Биыл 50-ден астам көпқабатты үйдің қасбеті әрленіп, ішінара жөнделді. Жағалау абаттандырылып, жалпы аумағы 32 мың шаршы метр  болатын алты саябақ жаңартылды.

Жандос Дүйсенғалиев, қала әкімінің орынбасары:

- Назарбаев даңғылында ескі үй көп. Биыл соның 20-дан астамын жаңарттық. Кейбірінің қасбетін безендіріп, біршамасын жөндеп шықтық. Бұл жұмысқа қаладағы кәсіпкерлер де қолдау көрсетіп, белсене атсалысты.

Келер жылы Оралда урбанистика орталығы ашылады деп жоспарланған. Онда жиналған кәсіби мамандар қаланы бірыңғай келбетке ыңғайлап, жаңа алаңдар мен көшелердің жобасын жасайды.

Эльмира Ахметова, Альбина Құмарғалиева, Қалыбек Ақырап, Эльдар Аюпов