Оралда үш егіз жігіт әскер қатарында борышын өтеп жүр

Оралдағы №5517 әскери бөлімінде үш егіз жігіт азаматтық борышын өтеп жүр.

Ұлттық Ұлан сапында ағайындылардың қызмет етуі жиі кездесетін жағдай. Бірақ үш егіздің бір маусымда бір ротаға түсуі алғаш рет, дейді бөлім басшылығы.

Армия қатарына Мәди мен Мақсат Ақтөбеден шақыртылса, Ришат пен Рафхат Атыраудан, ал Константин мен Кирилл Алматыдан келген. 

Әскери бөлімнің әр күні қарбалас сәттерге толы. Сарбаздардың сап түзеп адымдағаны, автоматты шашып-жинаған дыбыстары алыстан естіледі. Оқу-жаттығу сабақтарында белсенді көрінгендердің қатарында алматылық Ставинскийлер де бар. Олардың түрі бір болғанымен армандары әртүрлі. Константин келешекте ресторан бизнесімен айналыссам дейді, ал Кирилл әскер қатарында қалғысы келеді.

Кирилл Ставинский, жас сарбаз:

- Мен алдағы уақытта Ұлттық Ұлан сапында келісім-шартпен қалып, Алматыда қызмет еткім келеді. Болашақта полковник шеніне дейін жетуді армандаймын. Еліме адал қызмет етемін! 

Ал Ришат пен Рафхат әскерге Атырау облысынан шақыртылды. Үлкені Ришат армиядан босаған соң, жоғары оқу орнына түсіп заңгер болсам дейді. Рафхат та ағасынан қалғысы келмейді. Екеуі үнемі бірге жүреді, қандай тапсырманы да бірге орындайды.

Ришат Құспанғали, жас сарбаз:

- Бізді әлі ажырата алмайды кім-кім екенімізді. Қазір бір ротада бірге қызмет етеміз, бір взводтамыз. Бір бөлімшеде бірге жатамыз. Бірге жүреміз қазір.

Ақтөбелік Мәди мен Мақсат Рахметуллиндердің де желтоқсан айында армияға алынғаннан бері жұптары жазылған емес. Ағайындылар өмір бойы қандай қиындықты да бірге еңсеріп келе жатқанын айтады.

Мақсат Рахметуллин, жас сарбаз:

- Әрине  егізім әрдайым қасымда болса өзіме қолдау білдіреді. Қуанышта да бірге, қайғыда да бірге әрдайым бір-біріміздің жетістіктерімізді көрсек қуанамыз, бір-бірімізге қолдау береміз. Мен одан 10 минутқа үлкенмін. Оның да қорғайтын кезі болады, менің де қорғайтын кезім болады.

Ұлттық Ұланның Оралдағы №5517 әскери бөліміне желтоқсанда 200-дей жас сарбаз шақырылған. Олардың қатарында үш егіз болған. Мұндай жағдай тәжірибемізде бірінші рет кездесті дейді бөлім басшылығы.

Алмас Балтабеков, №5517 әскери бөлімінің батальон командирінің орынбасары:

- Бөлім командирінің бұйрығы бойынша олар бөлінбейді. Әрқашан қызметте болсын бір жерге түседі және бір бөліністе қызмет атқарады. Олардың көңіл-күйін, психологиялық жағдайын мен зерделеуге міндеттімін. Сарбаздар өте жан-жақты. Әскери өмірге құлшыныстары керемет. Егіздер былай айтқанда өте жақсы нәтиже көрсетуде. Сабақ үлгірімі бойынша және физикалық тұрғыдан жаттығулар көрсету бойынша алғы шепте деп айтса болады. 

Армияға алынған жас сарбаздар жақында Отанға адал қызмет етуге салтанатты түрде ант берді. Қазір олар қала көшелеріндегі қоғамдық қауіпсіздікті қалтқысыз қадағалап, өз борышын өтеп жүр.

Е. Жылқайдарұлы, Қ. Ақрап, Э. Аюпов