Ормуздың бұғатталуы: Сауд Арбиясы мұнай жеткізетін балама бағытты жандандырмақ

Bloomberg агенттігінің мәліметінше, шығыс-батыс бағытындағы «Petroline» құбыры қазір бар қуатында жұмыс істеп тұр.

Bloomberg дерегіне сәйкес, шөл арқылы тартылған алып құбырмен тәулігіне шамамен жеті миллион баррель мұнай айдалады. Мемлекеттік мұнай компаниясы Aramco бұл мәселені түсіндіруден бас тартты. Дегенмен наурыз айының басында компания басшысы Амин Нассер құбыр жақын арада толық жүктемемен жұмыс істейтінін мәлімдеген еді.

Ұзындығы шамамен 1200 шақырымға созылатын бұл құбырдың маңызын асыра бағалау қиын. Ол Парсы шығанағына жақын кен орындарынан мұнайды тікелей Қызыл теңіз жағалауындағы Янбу портына жеткізеді. Сала сарапшылары оны «Ормуз бұғазын айналып өтетін шешуші көлік дәлізі» деп атайды. Сауд Арабиясы бұл құбырды дәл осындай дағдарыс жағдайына арнап, 1981 жылы салған. Ол кезде Иран мен Ирак арасында соғыс жүріп жатқан.

2008–2012 жылдары Біріккен Араб Әмірліктері де инфрақұрылымды күшейтіп, Абу-Даби шикі мұнай құбырын іске қосты. Алайда ол Ормуз бұғазының жабылуын тек ішінара ғана өтей алады, сондықтан толыққанды балама бола алмайды.

Құбыр желілерінің тағы бір осал тұсы – олардың инфрақұрылымының қорғансыздығы. Бұған дейін саудиялық құбыр дрон шабуылдарына ұшыраған, ал мұндай қауіп қайта қайталануы мүмкін.

Осыған дейін жазғанымыздай, Стармер мен Трамп Ормуз бұғазын ашудың маңыздылығын мойындады.