Сауд Арабиясы Қытайға мұнай жеткізілімін екі есе қысқартады

Жеткізілімнің қысқаруы мұнай бағасының рекордтық деңгейге жетуі және жеткізу тізбектеріндегі іркілістер аясында орын алып отыр.

Сауд Арабиясы мамыр айында өзінің негізгі сатып алушысы Қытайға жеткізілетін мұнай көлемін екі есе азайтуды жоспарлап отыр.

Bloomberg агенттігінің мәліметінше, ағымдағы жылдың мамыр айында Қытайға жеткізілетін мұнай көлемі 20 млн баррель болады. Салыстыру үшін, сәуір айында корольдік 40 млн баррель мұнай жөнелткен.

Жеткізілімнің қысқаруы Сауд Арабиясының ұлттық мұнай компаниясы Азия нарығы үшін бағаларды рекордтық деңгейге көтергеннен кейін орын алған. Бұл жағдай Ормуз бұғазындағы ахуалмен байланысты.

Бұған дейін Франция мен Ұлыбритания Ормуз бұғазында әскери-теңіз миссиясын құру мәселесін талқылайтыны хабарланған болатын.

Сондай-ақ Сауд Арабиясы елдегі бірқатар энергетикалық нысандардың жұмысы уақытша тоқтауына байланысты мұнай өндіру көлемін тәулігіне 600 мың баррельге қысқартқан.