Сауд Арабиясы Азия елдеріне мұнайды арзанға береді

Сауд Арабиясы Азия елдеріне мұнайды арзанға береді.

Бұл туралы Блумберг басылымы жазды.

Сөйтіп, Эр-Рияд Азия үшін 1 доллар 20 центке арзан баға ұсынып отыр. Мұның себебі не, төркіні қайда жатыр деп ойлайсыз? Әдетте Сауд Арабиясы қара алтынның 1 тиынын да арзандатпауға тырысатын. Ендігісіне не жорық расында? Мұнай нарығындағы баға соғысы нені аңғартады?

Қазір әлемде геосаяси ахуал ушығып тұр. Санкциялардың құрсауында қалған Ресей бюджеттің жыртығын жамап әлек. Тіпті қара алтын өндірісін арттырып, арзан бағада сатуға мәжбүр. Бұл арада АҚШ тақауда Ресейдің екі ірі мұнай компаниясына санкция салды. Ал ресейлік мұнайдың негізгі тұтынушысы  - жер бетіндегі халықтың 3/1 бөлігі тұратын Қытай мен Үндістан. 

Осы арада Сауд Арабиясы мүмкіндікті құр жібермей Азия елдеріне жеңілдік ұсынып отыр.

Амин Нассер, SAUDI ARAMCO бас директоры:

- Әлемде энергетикалық шикізатқа сұраныс жоғары. Осыдан 10 жыл бұрын  бұл көрсеткіш 295 миллион баррель болатын. Бүгінде газға, мұнайға және көмірге сұраныс 345 миллион баррельге жетті. Бұл  кейінгі 10 жылдағы ең жоғары көрсеткіш.

Блумберг басылымы жариялаған дерекке қарағанда, Қытай ресейлік мұнайдан бас тарта бастады. Өйткені Бейжің АҚШ-тың қаржы жүйесіне тәуелді. Одан ажырап қалса, ірі банктер мен бірлестіктеріне қауіп төнеді. Сондықтан іргесіндегі көршісінен мұнай тасымалын толық көлемде болмаса да тежей тұруға мәжбүр. Бір  есептен дәл қазір Қытайдың мұнайсыз қалам деп сасатындай жөні де жоқ.  Жеткілікті мұнай қорын жинап қойған.

Халықаралық Энергетикалық агенттіктің мәліметі бойынша оның қоймасында 500-550 млн баррель қара алтын сақтаулы. Бұл мұндай сын қатерлі кезеңнен аман шығып, жаңа экспортаушы ел табуға мүмкіндік береді, дейді сарапшылар. Салыстырар болсақ, қазір АҚШ-тың стратегиялық мұнай қоры - 402 млн баррель. Ал Үндістанда өте аз. Небәрі 37 млн баррель. Бұл бір айға да жетпейтін қор. 

Демек, қазір Сауд Арабиясының Азия елдеріне арзан баға ұсынуы тегін емес. 2 жарым млрд тұрғыны бар нарыққа ықпалын нығайтпақ, дейді сарапшылар.

Есесіне Еуропа елдері үшін баға өзгеріссіз қалды. Себебі Еуроодақ ОПЕК елдерінен экологияны ластағаны үшін деп қомақты айыппұл талап етіп отыр. Кәрі құрлық ұйымы бұл арқылы табиғатқа келетін залалды азайтпақ. Ал ОПЕК елдері бұл шектеудің күшін жоймаса, көгілдір отын жөнелтуді мүлде тоқтатамыз, деп отыр.  

Саад бин Шерида Әл Кааби, Қатардың энергетика министрі:

- Еуропа экологияны ластауға қатысты талабын өзгертпесе, табиғи газ  тасымалын мүлде доғарамыз. Компанияның жаһандық табысына 5 пайыз айыппұл салу кірісімізді едәуір азайтады. Біз табиғатқа залал келтіруді нольдік деңгейге жеткізе алмаймыз. Бұл мүмкін емес нәрсе. Сондықтан мұндай талап қоюдың өзі қисынсыз.

Бүгінгі мұнай нарығы жаһандық саясаттың айнасы тәрізді. Үндістан мен Қытай әлем мұнайының 22 пайызын тұтынады, яғни ең ірі тұтынушы саналады.

Демек, бұл нарық үшін нағыз бәсеке басталуы мүмкін.

Зайнұр Байжігіт