Сауд Арабиясы Меккеде ауқымды мегажобаны іске қосты

Сауд Арабиясының жаңалықтар агенттігінің хабарлауынша, елдің тақ мұрагері әрі Премьер-министрі Мухаммед бен Салман бен Абдулазиз әл-Сауд «Король Салманның қақпасы» жобасының басталғанын жариялады. Бұл жоба экономиканы әртараптандыруды көздейтін «Vision 2030» ұлттық бағдарламасы аясында жүзеге асырылып жатыр.

— «Король Салманның қақпасы» жобасы әл-Харам мешітінің жанында стратегиялық маңызы бар жерде орналасқан. Бұл көпфункционалды кешен Мекке қаласының инфрақұрылымын сапалы жаңа деңгейге көтеруді, оны жаһандық деңгейдегі қала үлгісіне айналдыруды мақсат етеді, — делінген Сауд Арабиясы жаңалықтар агенттігінің хабарламасында.

2036 жылға қарай кешен 900 000 адамды қабылдай алатын болады. Ол жабық намазханалар мен ашық аулалардан, тұрғын үйлерден, мәдени кеңістіктер мен қызмет көрсету нысандарынан тұрады. Жоба аясында 19 000 шаршы метр тарихи және мәдени аумақ қайта жаңғыртылып, 300 000 жұмыс орнын ашу жоспарланып отыр.

Бұдан бұрын Сауд Арабиясы Йемен үкіметіне шамамен 368 млн доллар, ал Палестинаға 90 миллион доллар көлемінде көмек көрсететіні хабарланды.