Өскеменде 3 егіз сарбаз әскери қызметте бірге жүр

Өскемендегі әскери бөлімде, үш егіз сарбаз жұптары жазылмай қызмет атқарып жүр.

Сыңарымен сапқа тұрған жас сарбаздар бір-біріне демеу болсын деп оларды бір ротаға алған. Командирлер де жауынгерлерге әбден үйреніп, бауырларды жазбай танитын болған. Сыртқы келбеті ұқсас болғанымен, әрқайсының мінезі мен болмысы бөлек, - дейді. 

Нұрсұлтан мен Ерсұлтан әскерге шақыру қағазын бірге алып, бүгінде шабуылдаушы бригада құрамында жүр. Физикалық дайындықтан өтіп, әскери-оқу жаттығуларында бір-біріне демеу болады. Болашақта егіз бауырлар шекара әскерінде қызмет етіп, елдің алыс шептерін қорғауды мақсат еткен.

Нұрсұлтан Әмелбек, қатардағы жауынгер:

- Әскерде жүргеніме 8 айдан асты. Егізім Әмелбек Ерсұлтан да менімен бірге бір казармада. Бәрі жақсы. Өзімнің егемендік жерімді қорғау үшін бәріне үйреніп жатырмын.

Тарбағатайлық  Айдос пен Елдос Жамболатұлы да Әскери бөлімнің спорт залында темір көтеріп, шынығып жүр. Тарбағатай ауданынан келген егіз сарбаздар өздеріне жүктелген міндетті жауапкершілікпен орындайды. Әскери қызмет олардың спортқа деген ынтасын арттырған. Қазір 27943 әскери бөлімінің кітапханасында қажетті әдебиеттер жеткілікті. Гаджеттерден алшақ ортада сарбаздар бос уақытын кітап оқуға арнайды.

Ал Данил мен Никита Симоновтардың ойы сергек, білімге құштар. Бос уақытында шахмат ойнап, зейіні мен логикасын шыңдайды. Әскери қызметін аяқтағаннан кейін егіздер аспаз мамандығын меңгеріп, өз кәсіптерін ашуды армандайды.

Данил Симонов, қатардағы жауынгер:

- Бізді бір-бірімізден ажыратпағаны үлкен қолдау болды. Біз әрдайым бір-бірімізге сүйенеміз, қамқорлық жасаймыз. Әскер бізді болашақ өмірге дайындап жатыр. Қажет болған жағдайда Отанымызды, отбасымызды қорғауға дайынбыз.

Жас сарбаздар 2026 жылды алғаш рет отбасынан жырақта қарсы алмақ. Жақындарының ақжарма тілегін олар тек телефон арқылы естиді. Осыны ескерген командирлер жауынгерлерге мерекелік көңіл күй сыйлауды мақсат еткен. Қазір олар әскери бөлім аумағын безендіріп, жаңа жылды көтеріңкі көңіл күймен қарсы алуға дайындалып жатыр.

Авторлары: Рүстем Қайратұлы, Вячеслав Ветлугин, Дмитрий Пыхтин