Өскеменде жаңа бағытта автобус қозғалысы жанданады

Өскемен іргесіндегі Шмелёв Лог кенті тұрғындарының қоғамдық көліксіз қалғанына бір жыл болды. Ауыл ішінде автобус қатынасы жоқ, ал ең жақын аялдама елді мекеннен шамамен бір шақырым қашықта орналасқан.

Қалалық әкімдік бұл мәселені назарға алып, бағытты қайта қарастырып жатыр. Енді шеткі ауданға дейін автобус жүретін болады. Әкімдік өкілдерінің мәліметінше, жаңа бағыттарды іске қосу кезінде жеке тасымалдаушылардың шығындары мемлекеттік субсидия есебінен өтеледі.

Шмелёв Лог кенті қала орталығынан 20 минуттық жерде орналасқан. Бірақ елді мекен жаққа автобус қатынамайды. Мұнда асфальт болмағандықтан тұрғындар жай жолмен жаяу жүруге мәжбүр. 

Серік Абыроев, Шмелёв Лог кентінің тұрғыны:

- Былтыр ақпан айында автобус болады деп уәде берген. Ол әлі қолға алынған жоқ. Осы жағдайларды ескере отырып, автобусты жүргізсеңіздер жақсы болар еді. Содан кейін негізгі жол жақты жөндесеңіздер. Енді асфальт биыл төселмейді. Асфальт болмаса да, менің көпшілік атынан сұрарым, бізге құм төсеп берсеңіздер.

Ақерке Жексембаева, Шмелёв Лог кентінің тұрғыны:

- Бәрін сұрап-біліп отырамыз. Алайда тоғыз ай болды, тек қана: «Біз сөйлесіп жатырмыз, біз іздеп жатырмыз» дегенді естіп жатырмыз. Ешқандай қозғалыс жоқ. Біз міне қалай жаяу жүрміз, солай жүрміз.

Өскемен бойынша 300 автобус жүреді. Алайда қала шетіне қатынайтындары бірен-саран. Бұл мәселені жергілікті билік өкілдері тасымалдаушыларға субсидия бөлумен шешпек. Оның көлемі бір млрд теңгеге жуықтайды. 

Александр Светаш, қалалық мәслихаттың төрағасы:

- Қазір бірнеше жаңа бағыттар ашылды. Олар қаланың шетіне де қатынайды. Биыл қозғалыс кестесі ұлғайтылып, 20 ықшам ауданды қамтып отыр.

Енді автобус бағыттары қаланың ең шетіне дейін қатынайды. Бұл тізімге Шмелёв Лог кенті де енгізілді. Олардың қозғалыс кестесі GPS жүйесі арқылы бақыланады. Биыл облыс орталығына қосымша 40 жаңа қоғамдық көлік сатып алынады. 

Авторлары: Айдарбек Айтмұхамбетұлы, Вячеслав Ветлугин, Дмитрий Пыхтин