Отандық стриминг платформалар қаншалықты қолжетімді?

Орта Азиядағы ең ірі медиа апталық Astana Media Week 2025 бүгін де жалғасты. Тоғызыншы рет ұйымдастырылған форумның екінші күнінде 1 000-нан астам медиамаман, сарапшы спикер мен ел өңірлерінен келген БАҚ өкілдері журналистикадағы кәсіби шеберлікті шыңдау мен жаңа бетбұрыс жолдарын бағамдады. Орталық Азия, Еуропа, Әзербайжан мен Қытайдан келген сарапшылар да өз елдеріндегі саланың жаңашылдықтарын тақырыпқа тұздық етті, деп жазады Egemen.kz.

Фото: Yuganov Konstantin / Shutterstock / FOTODOM

Көрермен көңілінен шығатын контент жасау мен дайын өнімді жеткілікті деңгейде назарға ұтымды ұсыну – тиынның екі беті секілді бөлек іс. Алғашқы сатыдан өткен шығармашылық ұжым екінші баспалдаққа таяғанда тежелуі мүмкін. Өйткені медиаөнімді қай жолмен жарнамалау, қандай платформада көрсету, жобаға кеткен шығынды өндіру секілді сауалдар осы тұста туады. Кейінгі жылдары тәуелсіз бастамашылардың осы мазмұндағы жүгін стриминг платформалар жеңілдетіп отыр. Олар өз кезегінде өнімді сатып алып, сәйкесінше жеке платформаларында ғана көрсетуді көздейді. Форум аясында медиаөнім өндірушілер мен стриминг индустрия өкілдері іс жүзінде кезігіп отырған кедергілерді ашық талқылады. Сондай-ақ қатысушылар көрермен талғамының өзгеруі, платформалар арасындағы бәсеке және жаңа монетизация модельдері жайлы да пікір алмасты.

Панельдік сессияның қатысушысы, «Qulaqsal» креативті студиясының бас продюсері Нұртілеу Амангелді отандық стриминг платформалардың шығармашылық ұжымдарға ұсынатын қаржысы көңіл көншітпейтінін атап өтті.

«Тәуелсіз креативті студияларға кино-сериалдарды түсіріп, стриминг платформаларға ұсыну әлдеқайда жеңіл. Дегенмен біздің тәжірбиемізде жаңадан ашылған платформалар еңбегімізді лайықты бағалай қоймады. Мәселен, кино туындыны түсіруге 60 миллион шығындасақ, нарықтағы бағадан төмен етіп 20 миллион ұсынып жатады. Сондықтан біз секілді шығармашылық ұжымдарға алтернативті жол іздеуге тура келеді. Меніңше, тың идеямен киноиндустрияға қадам басқан талантты қолдау тетіктерін енгізу керек. Бұл ұсынысқа стриминг платформалар да мүдделі болса қос тарап та ұтар еді», деді Нұртілеу Амангелді.

Қазір еліміздегі стриминг платформалар жүйесі аяқтан нық тұрмағаны түсінікті. Десе де Кинопоиск, Movie service пен осы жылдың қыркүйегінде тұсауы кесілген UNICO Play ұлттық стримингтік платформалары салаға серпін беріп келеді. Платформа өкілдерінің қазіргі көздегені онлайн кино алаңды азаматтардың қолдануына ыңғайлы ету және өзара бәсекелестік арқылы кемшін тұсты түзеу екен. Бұл туралы отандық ТВ+ онлайн платформасының контент-директоры Сандуғаш Рахымжанова тілге тиек етті.

«Кейінгі жылдары әлемде Netflix, Amazon prime, Ivi сияқты платформалар жиі қолданылып жүр. Аса танымал Netflix-ке жазылушылар саны миллионнан асып жығылады. Netflix бұған дейін шығарылған фильмдер ұсынатын медиатека ғана емес, өзі де фильмдер түсіруді қолға алып отыр. Біз де осы үлгіні қолданамыз. Сонымен бірге, қолданушылардың платформаны пайдалану деңгейі ыңғайлы болу үшін біршама тәуекелге барып отырмыз. Кей жүйелер, тіпті жеке деректерді термей-ақ, күрделі функцияларды орындамай-ақ қолжетімді. Сәйкесінше, медиаөнімге қолжеткізу мүмкіндігін сыйлайтын тіркелу құны да 4 500 теңге шамасындағы символдық баға», деген ТВ+ онлайн платформасының контент-директоры сатып алушы контенттің көлеңкелі алаңдарда таралып кетпеуіне де күш салатынын айтты.

«Жаһандану кезеңінде кинотуындылардың түрлі телеграм араналар арқылы пираттық жолмен таралып кету қаупі жоғары. Бұл өз кезегінде кино авторларының діттеген қаржысына қол жеткізуіне айтарлықтай кедергі келтіреді. Ал стриминг платформалар бұл қауіпті болдырмауға кепілдік береді. Сондықтан платформалар тарапынан жасалатын ұсыныстар өндіруші кезігетін кедергілердің алдын алуды көздейді», деді спикер.

Сала мамандары жоғарыда аталған азды-көпті түйткілдер бар болғанымен елімізде онлайн көрермендердің саны артып жатқанын атап өтті. Демек, сапалы, сұраныстағы кино-сериалды үйден шықпай тамашалауға мүмкіндік беретін платформалар нарығына әлі талай компаниялар келуі бек мүмкін.