Қорғаста 17 қазақстандық жүк көлігі өртенді

Қазақстан мен Қытай шекарасындағы Қорғас халықаралық шекара маңы ынтымақтастығы орталығы аумағында ірі өрт болып, 17 қазақстандық жүк көлігі жанып кетті.

Жетісу облыстық Төтенше жағдайлар департаментінің мәліметінше, оқиға 2026 жылғы 4 мамырда Қытай тарапына тиесілі аумақта болған. Сол себепті Қазақстанның «101» және «112» жедел қызметтеріне хабар түспеген.

Ал Панфилов ауданы әкімдігінің дерегіне сәйкес, өрт салдарынан жүк көліктері толықтай жанып, ішіндегі тауарлар да зақымданған. Оқиға орнынан түсірілген бейнежазбалар әлеуметтік желілерде тарады.

Өрт Қытай аумағында болғандықтан, барлық тексеру жұмыстары сол елдің құзырлы органдары тарапынан жүргізіледі.

Өңір билігі зардап шеккен жүргізушілер мен көлік иелеріне құқықтық және өзге де қажетті көмек көрсетілетінін мәлімдеді.