Каспий теңізі Иран үшін басты сауда бағытына айналды

Иран сыртқы сауда логистикасын қайта қарап, негізгі бағыт ретінде Каспий теңізі арқылы тасымалды күшейтіп жатыр. Бұл туралы The National Interest хабарлады.

Сарапшылардың мәліметінше, Таяу Шығыстағы әскери шиеленіс пен Ормұз бұғазы маңындағы шектеулер Иранның дәстүрлі сауда жолдарын айтарлықтай әлсіреткен. Бұған дейін елдің сыртқы саудасының 90%-ға жуығы Парсы шығанағы арқылы жүзеге асса, қазіргі жағдайда теңіз тасымалының басым бөлігі тоқтап қалған.

Осыған байланысты Иран солтүстік бағытқа, яғни Каспий арқылы өтетін көлік дәліздеріне басымдық беруге мәжбүр. Енді бұл бағыт ел экономикасы мен әскери логистикасы үшін стратегиялық маңызға ие болып отыр.

Сарапшылар Каспий теңізінің ерекшелігіне де назар аударады. Бұл – тек бес жағалаулас мемлекетке тиесілі тұйық су айдыны болғандықтан, сыртқы әскери-теңіз күштері үшін жабық кеңістік саналады.

Осылайша, геосаяси ахуалдың өзгеруі Иранның сауда маршруттарын түбегейлі қайта құруына әкеліп, Каспий теңізін негізгі логистикалық арнаға айналдырды.