Өтірік қағаз беріңізші : Алматыдағы дауыс беру учаскесінде түсініксіз жайт болды (ВИДЕО)

Қазақстанда жаңа Конституцияға байланысты республикалық референдум өтіп жатыр. Ел бойынша дауыс беру учаскелері таңғы сағат 07:00-де ашылып, кешкі 20:00-ге дейін жұмыс істейді, деп хабарлайды Arasha.kz.

Кейбір учаскелер, әсіресе әскери бөлімдерде орналасқандары, сағат 06:00-ден бастап жұмысын бастаған. Сонымен қатар шетелдегі қазақстандықтар үшін дауыс беру Жапония мен Оңтүстік Кореяда жергілікті уақыт бойынша жүргізіліп жатыр.

Алайда Алматы қаласындағы №622 сайлау учаскесінде түсініксіз жағдай тіркелді. Екі адам учаскеге келіп, дауыс бергісі келетінін айтқан. Бірақ комиссия мүшелері оларды сайлаушылар тізімінен таппаған. Соған байланысты учаске қызметкерлері олардың дауыс бере алмайтынын түсіндірген.

Осы кезде әлгі азаматтар комиссия мүшелерінен “өтірік қағаз беріңізші, суретке түсіп алайын” деген өтініш жасаған. Алайда учаске қызметкерлері мұндай құжат берілмейтінін айтып, талаптарын орындаудан бас тартқан.

Соған қарамастан, әлгі екі адам дауыс беру жәшігінің жанында тұрып, суретке түскен. Учаскеде болғандар олардың бұл әрекеті неліктен жасалғанын сұрағанда, олар нақты жауап бермей, түсініктеме беруден бас тартқан.

Ал жалпы ел бойынша референдум белгіленген тәртіппен өтіп жатыр. Дауыс беруге 18 жасқа толған және сайлаушылар тізіміне енгізілген Қазақстан азаматтары қатыса алады. Бюллетень алу үшін азаматтар жеке куәлік немесе паспорт көрсетуі тиіс. Сонымен қатар eGov Mobile, Kaspi.kz немесе Halyk қосымшаларындағы цифрлық құжаттар да жарамды.

Бюллетеньде бір ғана сұрақ көрсетілген: азаматтар 2026 жылғы 12 ақпанда жарияланған Қазақстанның жаңа Конституциясын қабылдай ма? Дауыс берушілер құжатты қолдау немесе қабылдамау нұсқаларының бірін таңдауы керек.

Заң бойынша референдум өтті деп есептелуі үшін сайлаушылардың жартысынан астамы дауыс беруге қатысуы қажет. Ал жаңа Конституцияны қабылдау туралы шешім учаскелерге келген азаматтардың басым көпшілігі қолдаған жағдайда қабылданады. Референдумның ресми қорытындылары дауыс беру аяқталғаннан кейін жеті күн ішінде жариялануы тиіс.

Ал Алматыдағы №622 учаскеде болған күмәнді жағдайға байланысты азаматтардың әрекеті әлеуметтік желілерде талқыланып жатыр. Олардың нақты қандай мақсатпен суретке түскені әзірге белгісіз.