Өзбекстанда көкпарға қызығушылық артты

Өзбекстанның қалың қазақ мекендейтін Ташкент облысында көкпар ойынына деген қызығушылық жылдан жылға артып келеді.

Жер-жерде апта сайын өтетін 3-4 тойда міндетті түрде көкпар беріледі. Атқа қонғандардың дені қандастарымыз болғанымен өзге ұлт өкілдерінің де ұлттық ойынға деген қызығушылығы анық байқалады, дейді мұндағылар.

Көкпар десе делебесі қозбайтын қазақ кемде кем. Өзбекстандағы қандастар ұлттық ойынның аясын кеңейтіп, оның танымдылығын ел ішінде арттырып отыр. Қазір тіпті өзге ұлт өкілдері де той өткізсе, көкпарды бағдарламаға қосуды әдетке айналдырған.  

Жақсылық Жорықпаев, Шыршық қалалық қазақ мәдени орталығының төрағасы:

- Бұл Өзбекстанда болып жатқан көкпарға Тәжікстаннан, Қазақстаннан, Қырғызстаннан көкпаршылар келеді. Аптасына 2-3 мәрте көкпар болып тұрады. Біз сол Өзбекстанның тұрғындары, қазақтары көкпарға әрдайым қатысамыз. Сондай қазақтың қайнаған қаны бар кеудемізде.

Жігіттің намысы сынға түсетін ойында астыңдағы аттың мықты болуы заңды дүние. Биіктігі нардай, кеуделі жануарлардың құны сәйкесінше бұл жақта қымбаттап кеткен. Жеңіске жету үшін біз суреттеген Қамбар ата тұқымын қандастарымыз Қазақстаннан әкелетін көрінеді.

Молдабек Боранбаев, Айдаралы ауылының тұрғыны:

- Жақсы ат болса, нарқы қымбат. Ат жарап тұрса, мәреге салым салса қымбат қой. Он мың мен 5 мың доллар шамасында болады.

Айдаралы ауылында өткен жаппай көкпарға 500-ге жуық шабандоз қатысты. Бас жүлдеге тігілген екі автокөлік жергілікті жігіттерге бұйырды. 

Дулат Нуркин